ᒐᕙᒪᖃᕐᕕᖓ ᓄᓇᓕᐸᐅᔭᐅᓪᓗᓂ ᐋᓐᑎᐅᕆᔫᒥ, ᑐᕌᓐᑐ ᓯᓈᓃᖅᑐᖅ ᐱᖓᓐᓇᖓᓂ ᑕᓯᕐᔪᐊᖓᑕ ᐋᓐᑎᐅᕆᔫᑉ ᑐᑦᑕᕐᕕᐅᓪᓗᓂᓪᓗ ᑐᕌᓐᑑᑉ ᐊᕙᓗᐊᓃᑦᑐᓄᑦ. ᐃᓄᖃᖅᑐᖅ ᐅᓄᕐᓂᖃᖅᑐᓂᒃ 7 ᒥᓕᔭᓐ−ᑲᓴᓐᓂᒃ, ᑐᕌᓐᑑᑉ ᐊᕙᓗᐊᓗ ᐊᖏᓂᖅᐸᐅᔪᖅ ᓄᓇᖃᕐᕕᐅᓪᓗᓂ ᑲᓇᑕᒥ, ᑐᕌᓐᑐ ᐊᖏᓂᖅᐸᐅᓪᓗᓂ ᓄᓇᓕᐸᐅᔭᕐᓂᒃ ᑲᓇᑕᒥ.
ᑐᕌᓐᑐ ᓄᓇᑐᖃᕆᔭᐅᔪᖅ ᐊᒥᓱᓄᑦ ᓄᓇᖃᖅᑳᖅᓯᒪᔪᓄᑦ ᐱᖃᓯᐅᓪᓗᒋᑦ ᒥᓯᓵᒐᔅ ᑯᕋᑕᑦᒥᐅᑦ, ᐊᓂᔅᓈᕖᑦ, ᓯᐸᕇ, ᕼᐊᑎᓄᓴᓃ ᐊᒻᒪᓗ ᐅᐊᓐᑕᑦ ᓄᓇᖃᖅᑳᖅᓯᒪᔪᓄᑦ. ᐊᒥᓱᓄᑦ ᐊᖏᕐᕋᕆᔭᐅᔪᖅ ᐃᓕᖅᑯᓯᑐᖃᖃᑎᒌᙱᑦᑐᓄᓪᓗ, ᓄᓇᓕᕐᔪᐊᖓ ᐃᓚᒋᔭᐅᔪᖅ ᓄᓇᕐᔪᐊᕐᒥ ᓇᒻᒥᓂᕆᔭᐅᔪᓄᑦ ᑐᑦᑕᕐᕕᐅᔪᓄᑦ, ᑮᓇᐅᔭᓕᕆᓂᕐᒧᑦ, ᓴᓇᙳᐊᖅᑐᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᐊᓐᓄᕌᓕᕆᓂᕐᒧᓪᓗ.
ᐅᐸᑦᑕᐅᖁᔭᐅᔪᑦ ᑐᕌᓐᑐᒥ:
- ᐅᐸᓪᓗᒍ CN Tower ᓇᐸᔪᐊᓗᒃ ᑕᑯᔭᖅᑐᕐᓗᑎᑦ ᖁᑦᓯᑦᑐᒥ ᓄᓇᓕᕐᔪᐊᖓᓂ, ᓂᕆᓗᑎᓪᓗ ᑲᐃᕙᑦᑐᒥ ᓂᕆᕕᒻᒥ ᖁᓛᓂ ᓇᐸᔫᑉ. ᓇᖏᐊᙱᒃᑯᕕᑦ ᐱᓱᒍᓐᓇᖅᑐᑎᑦ ᑭᓪᓕᖓᒍᑦ Edge Walk, ᐱᓱᕝᕕᒋᓗᒍ ᓯᓚᑖᓂ ᑭᓪᓕᖓᒍᑦ CN Tower ᓇᐸᔪᐊᓘᑉ
- ᑕᑯᒋᐅᕆᐊᖅᑐᕐᓗᒋᑦ ᑕᕆᐅᕐᒥᐅᑕᐃᑦ Ripley’s Aquarium ᑕᑯᔭᒐᖃᕐᕕᖓᓐᓂ, ᐱᓱᕝᕕᐅᒍᓐᓇᖅᑐᖅ ᓱᓪᓗᓕᒃᑯᑦ ᐃᒪᐅᑉ ᐊᑖᓂ ᑕᑯᒍᓐᓇᖅᑐᒋᑦ ᖃᓂᑦᑐᒥ ᑕᕆᐅᕐᒥᐅᑕᐃᑦ ᖃᓄᐃᑦᑐᑐᐃᓐᓇᐃᑦ ᐱᖃᓯᐅᓪᓗᒋᑦ ᐃᖃᓗᕐᔪᐊᑦ, ᑕᓕᕋᓴᓖᑦ, ᐃᖅᑲᕐᓂᐊᖅᑏᑦ, ᐊᓯᒐᓚᖏᓪᓗ ᑕᕆᐅᕐᒥᐅᑕᑦ.
- ᕿᒥᕐᕈᐊᓗᒋᑦ ᓴᓇᙳᐊᖅᑎᓄᑦ ᓴᓇᔭᐅᓯᒪᔪᑦ ᐅᖓᑖᓃᑦᑐᓂ 120 ᓴᓇᙳᐊᖅᑏᑦ ᓂᐅᕕᐊᑦᓴᖃᖅᑏᓪᓗ St. Lawrence ᓂᐅᕕᕋᕐᕕᖓᓂ. ᓂᕿᑦᓯᐊᑦ ᑕᑯᒐᑦᓴᐃᓪᓗ ᐅᑕᖅᑭᔪᑦ!
- ᐱᓱᕋᔮᓪᓗᑎᑦ Distillery District ᐃᒥᐊᓗᓕᐅᕐᕕᒥᓂᕐᒥ, ᓂᐅᕕᕋᕐᓂᕐᓗ ᓂᕆᓂᕐᓗ ᑲᑎᑦᑐᑎᑦ ᓴᓇᙳᐊᖅᑐᓕᕆᓂᕐᒥ ᐃᓕᖅᑯᓯᓕᕆᓂᕐᒥᓪᓗ. ᐅᖓᑖᓃᑦᑐᑦ 40 ᓂᐅᕕᕐᕖᑦ ᐊᒥᓲᓪᓗᑎᓪᓗ ᓂᕆᕕᑦᓴᓂ ᓇᓖᕌᕐᕕᑦᓴᐃᑦ, Distillery District ᐃᒥᐊᓗᓕᐅᕐᕕᒥᓂᖅ ᑐᑦᑕᕐᕕᐅᔪᖅ ᑐᕌᓐᑐᒥᐅᑕᕐᓄᑦ ᐳᓚᕋᖅᑎᓄᓪᓗ. ᑐᕌᓐᑐᒦᓐᓂᕈᕕᑦ ᖁᕕᐊᓱᕝᕕᐅᑎᓪᓗᒍ, ᐃᒥᐊᓗᓕᐅᕐᕕᒥᓂᖅ District ᐃᓂᒋᔭᐅᒻᒥᔪᖅ ᓄᓇᓕᐸᐅᔭᖓᑕ ᐊᖏᓂᖅᐹᖑᓪᓗᒍ ᖁᕕᐊᓱᕝᕕᑦᓯᐅᑎᓂᒃ ᓂᐅᕕᕋᕐᕕᓐᓂ.
ᓯᓚᑖᓅᕐᓗᑎᑦ ᑐᕌᓐᑑᑉ ᐃᓪᓗᕐᔪᐊᖃᕐᕕᖓᑕ, ᕿᒥᕐᕈᐊᒋᐊᒃᑲᓐᓂᕐᓗᑎᑦ ᓄᓇᓕᑉᔪᖓᓂᕐ ᑐᕌᓐᑑᑉ.
ᐅᐸᑦᑕᐅᖁᔭᐅᔪᑦ ᓄᓇᓕᕐᔪᐊᖓᓂ ᑐᕌᓐᑑᑉ:
- ᓄᓇᓯᐅᕐᓗᑎᑦ ᕚᓐᒧᑦ ᐅᓪᓗᓯᐅᕆᐊᖅᑐᕐᓗᑎᑦ Canada’s Wonderland ᐃᑭᒪᔭᕋᕝᕕᖅᑐᖏᓐᓄᑦ, ᑲᓇᑕᒥ ᐊᖏᓂᖅᐹᖑᔪᖅ ᐃᑭᒪᔭᕋᕝᕕᓐᓂ
- ᐅᐸᓪᓗᒍ ᑐᕌᓐᑐᒥ ᓂᕐᔪᑎᖃᕐᕕᒃ ᑕᑯᒋᐅᕆᐊᖅᑐᕐᓗᑎᑦ ᐆᒪᔪᕐᓂᒃ ᓇᑭᑐᐃᓐᓈᖅᓯᒪᔪᓂᒃ ᓄᓇᕐᔪᐊᕐᒥ
- ᑲᔾᔮᓇᖅᑐᒥ ᐱᓱᕋᔮᕕᓐᓄᑦ, ᑲᔾᔮᓇᖅᑐᓂ ᑕᑯᔭᖅᑐᕐᓗᑎᑦ, ᐅᐸᓪᓗᒍ Scarborough Bluffs ᐃᓐᓈᕈᖏᑦ
ᐅᐸᓪᓗᒍ ᑐᕌᓐᑐ ᐱᐅᓂᖅᐸᐅᖃᑕᐅᔪᓄᑦ ᓂᕆᔭᑦᓴᓄᑦ, ᐅᓐᓄᐊᓯᐅᕆᐊᕐᓗᑎᑦ, ᑲᔾᔮᓇᖅᑐᓂᓪᓗ ᑕᑯᒥᓇᕐᓂᖅᐸᐅᖃᑕᐅᔪᓂᒃ ᑲᓇᑕᒥ ᒥᐊᓕᒐᐅᓪᓗ ᐅᐊᓐᓇᖓᓂ.
