ᐅᓯᒃᑯᕕᒃᑰᖅᑐᑎᒍᑦ ᐱᔨᑦᓯᖅᐸᑦᑕᑦᑎᓐᓄᑦ
ᑎᑎᕋᐅᑎᒋᕙᕋ ᑐᓴᖅᑎᒍᒪᓪᓗᑎᑦ ᐊᓯᔾᔨᕐᓂᐅᑲᐃᓐᓇᕐᓂᐊᖅᑐᓂᒃ ᐅᓯᒃᑯᕕᒻᒥ ᐱᔨᑦᓯᕈᑎᒋᕙᑦᑕᕗᑦ ᐊᑯᓐᓂᖏᑕ ᐋᑐᕚ, ᐃᖃᓗᐃᑦ ᕿᑭᖅᑖᓗᒻᒥᓪᓗ ᓄᓇᓕᖏᑦᑕ ᑕᒪᓐᓇ ᐊᑐᓕᕐᓂᐊᖅᑐᖅ ᑕᒪᑐᒪ ᐱᓇᓱᐊᕈᓯᐅᑉ ᓄᙳᐊᓂ. ᑕᒪᒃᑯᐊ ᐊᓯᔾᔩᒍᑕᐅᔪᑦ ᐊᑐᕆᐊᖃᓚᕿᔪᑦ ᐅᓯᒃᑯᕕᒃᑰᖅᑎᑕᐅᔪᑦ ᐱᓯᒪᒌᖅᑕᕗᑦ ᑎᑭᐅᑎᒍᓐᓇᖁᓪᓗᒋᑦ ᐃᓂᑦᓴᓕᐅᕆᐊᖃᕐᓂᑦᑎᓐᓄᓪᓗ ᐅᓯᒃᑯᕕᒻᒨᖅᑕᐅᕙᓪᓕᐊᔪᑦ ᐊᑦᑕᓇᖅᑐᒦᖁᓇᒋᑦ. ᑕᒪᓐᓇ ᑲᔪᓯᑦᓯᐊᖁᓪᓗᒍ ᐱᓕᕆᐊᖃᕐᓂᐊᖅᑐᒍᑦ ᐊᐅᓪᓚᖅᑎᓪᓗᒋᑦ ᐱᓯᒪᒌᖅᑕᕗᑦ ᐅᓯᒃᑯᕕᒻᒥ ᐱᕕᓕᒫᑦᑎᓐᓄᑦ ᓄᑖᕐᓂᓪᓗ ᐱᒍᓐᓇᙱᑲᐃᓐᓇᕐᓂᐊᖅᑐᒍᑦ ᐊᐅᓪᓚᖅᑎᑕᐅᔪᑦᓴᕐᓂᒃ ᐅᓯᒃᑯᕕᒃᑯᑦ ᓇᓪᓕᑐᐃᓐᓇᖏᓐᓂ ᐋᑐᕚᒥ ᐃᖃᓗᓐᓂᓘᓐᓃᑦ ᐊᑯᓐᓂᖏᓐᓂ ᓈᑦᓰᖑᔭᓛᕐᓂᐊᖅ ᓄᕕᐱᕆ 6 ᐊᐃᑉᐱᕐᒧᑦ ᓄᕕᐱᕆ 9.
ᖃᐅᔨᒪᔪᕋᓴᐅᒐᑦᓯ, ᑲᓇᐃᑎᐊᓐ ᓄᐊᑦᑯᑦ ᑭᐅᔾᔪᑎᖃᖅᓯᒪᒻᒪᑕ ᓄᓇᓕᓐᓂ ᑐᐊᕕᕐᓇᖅᑐᖃᕐᓂᖓᓂᒃ ᐃᖃᓗᓐᓂ ᐱᓕᕆᖃᑎᖃᕐᓂᒃᑯᑦ ᐊᒥᓱᓂᒃ ᑎᑭᑎᑕᐅᕙᓪᓕᐊᓂᖓᓄᑦ ᖃᖓᑕᓲᒃᑯᑦ ᐊᖏᔪᒻᒪᕆᒃ ᐃᒥᖅ ᐃᖃᓗᓐᓄᑦ. ᐱᖓᓱᑦ ᐱᓇᓱᐊᕈᓰᑦ ᐊᓂᒍᖅᑐᓂ, ᐃᒥᖅ ᑎᑭᑎᑕᐅᕙᓐᓂᖓ, ᐊᑐᓕᑦᓴᐅᑎᒋᓚᐅᖅᑐᓂ, ᒪᕐᕈᐃᓪᓗᐊᖅᑐᖅ ᐅᖓᑖᓄᓪᓗ ᐊᒥᓱᙳᕆᐊᖅᓯᒪᓕᕐᒪᑕ ᑎᑭᑎᑕᐅᕙᑦᑐᑦ ᐃᖃᓗᓐᓄᑦ ᓱᓕᓗ ᑕᐃᒪᐃᖏᓐᓇᖅᑐᓂ. ᖃᓄᐃᓪᓗᐊᕐᓂᖓ ᐱᓕᕆᐊᖑᓯᒪᒌᖅᑐᓂ, ᑲᓇᐃᑎᐊᓐ ᓄᐊᑦᑯᓐᓄᑐᐃᓐᓇᐅᙱᑦᑐᖅ ᐊᓯᓕᒫᖏᓐᓄᓪᓗ ᐱᓕᕆᖃᑎᐅᔪᓄᑦ ᑕᒪᑐᒥᖓ, ᐊᔪᒐᐃᑦᑐᒻᒪᕆᒃ. ᑕᒪᓐᓇ ᐅᖃᐅᓯᕆᓪᓗᒍ, ᑕᖃᓇᖅᑐᒥᒃ ᐊᑦᓱᕉᑕᐅᓯᒪᓪᓚᕆᑦᑐᖅ ᐃᖅᑲᓇᐃᔭᖅᑎᖁᑎᑦᑎᓐᓄᑦ ᐋᑐᕚᒥ ᐃᖃᓗᓐᓂᓗ, ᓯᓚᑲᒻᒪᐅᖃᑦᑕᖅᑐᓂᓪᓗ ᕿᑭᖅᑖᓗᒻᒥ ᑕᒪᒃᑯᐊ ᕿᖑᕙᐅᖅᑲᒍᑕᐅᓚᕿᔪᑦ ᐅᓯᒃᑰᕆᐊᓕᓐᓄᑦ. ᕿᒥᕐᕈᒋᐊᖅᑕᐃᓐᓇᕆᓯᒪᔭᕗᑦ ᐊᑐᕆᐊᕈᓐᓇᖅᑕᕗᑦ ᐃᖅᑲᓇᐃᔭᖅᑎᖃᕆᐊᕐᓂᒃᑯᑦ ᖃᖓᑕᓲᓪᓗ ᐅᓯᒍᓐᓇᕐᓂᖏᑦ ᐊᒥᓱᙳᕆᐊᖅᓯᒪᓪᓗᒋᑦ − ᑭᓯᐊᓂᑦᑕᐅᖅ ᐃᖅᑲᓇᐃᔭᖅᑎᑦᓴᑭᓪᓕᐅᕐᓂᖅ ᖃᖓᑕᓲᓂᒃ ᐊᑐᐃᓐᓇᖃᕐᓃᓪᓗ ᐱᓇᐃᓗᑕᐅᓯᒪᒻᒥᔪᑦ. ᐃᓚᖏᓐᓂᒃ ᐋᖅᑭᒋᐊᖅᓯᓯᒪᓕᕋᓗᐊᖅᑐᒍᑦ ᑕᒪᒃᑮᓐᓅᖓᔪᓂᒃ, ᑭᓯᐊᓂᓕ ᐱᓇᐃᓗᑕᖃᕈᑎᒌᓐᓇᖅᑕᕗᑦ ᑕᒪᓐᓇ. ᑕᒪᒃᑯᐊ ᐊᓯᔾᔨᕐᓂᐅᑲᐃᓐᓇᖅᑐᐃᑦ ᐊᑦᑐᐊᓂᖃᙱᑦᑐᑦ ᐊᓯᖏᓐᓄᑦ ᐅᓯᒃᑯᕕᒃᑯᑦ ᐊᐅᓪᓚᖅᑎᑕᐅᕙᑦᑐᓄᑦ ᐊᐅᓚᓂᕆᕙᑦᑕᖏᓪᓗ ᑲᔪᓰᓐᓇᕐᓂᐊᖅᑐᑦ ᐊᓯᓕᒫᖏᓐᓄᑦ ᐊᖅᑯᑎᐅᕙᑦᑐᓄᑦ.
ᖃᐅᔨᒪᕗᖓ ᐊᒥᓱᓯᒍᑦ ᐃᓱᒫᓘᑎᖃᕋᑦᓯ ᐅᓯᒃᑯᕕᒃᑯᑦ ᑭᖑᕙᐅᖅᑲᔪᓂᒃ ᑕᒪᓐᓇᓗ ᐅᔾᔨᕆᕙᕗᑦ. ᑐᑭᓯᒪᒐᓗᐊᖅᑐᒍᑦ ᓄᖅᑲᖓᑲᐃᓐᓇᖅᑎᑕᐅᓂᖏᑦ ᓄᑖᑦ ᐊᐅᓪᓚᖅᑎᑕᐅᔪᑦᓴᐃᑦ ᐅᓚᕕᓐᓇᕆᐊᖓ, ᑕᒪᓐᓇᓗ ᑐᑭᑖᕈᑎᒋᓯᒪᓪᓗᑎᒍᑦ ᐱᔭᕆᐊᑭᙱᑦᑐᒥᒃ, ᐱᒻᒪᕆᐅᔪᕆᑦᓯᕗᒍᑦ ᐱᔭᕇᖅᑳᕆᐊᖃᕐᓂᑦᑎᓐᓂᒃ ᐅᓯᒃᑯᕕᒻᒦᔨᐊᑦᑎᓐᓂᒃ ᐱᒍᓐᓇᖅᓯᒍᓐᓇᖁᓪᓗᑕ ᓄᑖᕐᓂᒃ ᐊᐅᓪᓚᖅᑎᑕᐅᔪᑦᓴᕐᓂᒃ. ᑕᒪᓐᓇ ᐊᑐᕆᐊᙱᒃᑯᑦᑎᒍ ᐊᑦᑕᓇᖅᑐᒦᑦᑎᑦᓯᒍᓐᓇᖅᑐᖅ ᓄᑖᕐᓂᒃ ᐅᓯᒃᑯᕕᒃᑰᖅᑎᑕᐅᔪᑦᓴᕐᓂᒃ ᑭᖑᕙᕆᐊᖅᑕᐅᒃᑲᓐᓂᕋᔭᖅᓱᑎᓪᓗ ᒫᓐᓇᒃᑯᑦ ᐊᐅᓪᓚᖅᑎᒋᐊᓂᕗᑦ, ᑕᐃᒪᐃᒻᒪᑦ ᑕᒪᑐᒥᖓ ᐊᑐᕆᐊᖅᑯᒍᑦ ᑕᐃᒪᐃᑦᑐᖃᖁᓇᒍ.
ᑭᖑᓪᓕᖅᐹᖓᓐᓂ, ᐱᕕᑦᓴᖃᑲᐃᓐᓇᕈᒪᕗᖓ ᐃᓕᑕᕆᓗᒋᑦ ᐱᓕᕆᐊᖃᑦᓯᐊᕐᓂᖏᑦ ᓯᕗᒃᑲᑕᖅᑎᑦᑕ ᐃᖅᑲᓇᐃᔭᖅᑏᑦ, ᐊᓯᖏᓪᓗ ᐱᓕᕆᖃᑎᕗᑦ ᑎᒥᐅᔪᑦ ᑭᐅᔾᔪᑎᖃᖅᓯᒪᔪᑦ ᑐᐊᕕᕐᓇᖅᑐᒥᒃ. ᑐᑭᓯᒪᕗᖓ ᓄᒫᓱᓐᓂᖃᕋᑦᓯ ᑕᒪᒃᑯᓄᖓ ᑭᖑᕙᐅᖅᑲᓂᐅᔪᓄᑦ, ᑭᓯᐊᓂᑦᑕᐅᖅ ᕿᓄᐃᓵᑦᓯᐊᖁᔨᕗᖓ ᑭᒡᒐᑐᖅᑐᒋᑦ ᐱᓕᕆᖃᑎᕗᑦ − ᐱᓕᕆᐊᖃᓪᓚᕆᒻᒪᑕ ᐊᑦᓱᕈᖅᑐᑎᑦ.
ᑐᓴᕋᑦᓴᖃᒃᑲᓐᓂᕐᓂᐊᕐᒥᔪᒍᑦ ᐱᓇᓱᐊᕈᓯᐅᓂᐊᖅᑑᑉ ᐱᒋᐊᙵᕐᓂᖓᓂᒃ.
ᐋᓐᑐᕉ ᐸᐅᑉ
ᐊᖏᔪᖅᑳᑉ ᑐᖏᓕᐊ, ᐱᔨᑦᓯᕋᖅᑕᐅᔪᓄᑦ ᐊᐅᓚᑦᓯᓂᕐᒨᖓᔪᓄᓪᓗ
ᑲᓇᐃᑎᐊᓐ ᓄᐊᑦ
