ᓴᖅᑭᑦᑕᐅᑎᒋᔭᕆᐊᓕᒃ, ᒪᐃ 17, 2022, ᐋᑐᕚ, ᐊᓐᑎᐅᕆᐅ – ᐱᓕᕆᑦᑎᐊᕈᒪᓂᖅᓴᐅᓪᓗᑕ ᐱᔨᑦᑎᕋᕐᕕᒋᔭᑦᑐᓐᓄᑦ ᑲᓇᐃᑎᐊᓐ ᓄᐊᑦᑯᓐᓄᑦ ᐊᒻᒪ ᓴᙱᓂᖅᓴᐅᓕᖁᓪᓗᒋᑦ ᐅᓯᖃᑦᑕᕐᓂᕆᕗᑦ, ᐅᓪᓗᒥᑦ ᑐᓴᖅᑎᑦᑎᔪᒍᑦ ᓯᕗᓕᖅᑎᐅᔪᓂᒃ ᐊᓯᔾᔨᕐᓂᐅᔪᓂᒃ ᐊᖏᔪᖅᑲᐅᑎᐅᖃᑎᒌᖑᔪᓂᒃ.
ᒫᑎᐅ ᑉᓚᒪᓐᑕᓐ ᑎᒃᑯᐊᖅᑕᐅᓯᒪᔪᖅ ᓄᑖᕐᒧᑦ ᓴᖅᑭᑕᐅᕋᑖᕐᓂᑰᔪᒧᑦ ᐃᓂᒋᔭᐅᔪᖅ ᐊᖓᔪᖅᑳᑉ ᑐᒡᓕᐊᓄᑦ, ᐅᓯᖃᑦᑕᖅᑐᓄᑦ, ᒥᑦᑕᕐᕕᖕᓂᒃ ᐊᐅᓚᑦᑎᓂᕐᒥᑦ ᐊᒻᒪ ᖃᖓᑕᓲᒃᑯᕕᖕᓂᒃ. ᒫᑎᐅ ᖃᐅᔨᒪᓂᖃᑦᑎᐊᖅᑐᖅ ᐊᐅᓚᑦᑎᔾᔪᑎᑦᑎᓐᓂᒃ ᑲᒻᐸᓂᑦᑎᓐᓂᒃ ᐃᖅᑲᓇᐃᔮᖃᖃᑦᑕᕐᓂᕆᓚᐅᖅᑕᖓᓄᑦ. ᓯᕗᓪᓕᐅᔾᔨᒍᒪᔭᖓᓕ ᓴᙱᓂᖅᓴᐅᓕᖁᓪᓗᓂᐅᒃ ᐅᓯᖃᑦᑕᕐᓂᕆᔭᕗᑦ ᐱᔨᑦᑎᕋᑦᑎᐊᕐᒪᖔᑦᑕᓗ ᑭᖑᕙᖓᖏᑦᑐᒥᑦ, ᑕᐃᒪᙵᓂᓕᒫᖅ.
ᑕᒪᓐᓇ ᐊᓯᔾᔨᖅᑎᓪᓗᒍ, ᒫᑎᐅᑉ ᓵᑕᓄᑦ ᐊᒻᒪ ᓇᖕᒥᓂᖃᕐᓂᕐᒧᑦ ᐱᔭᒃᓴᕆᔭᖏᑦ ᑲᒪᒋᔭᐅᖔᕐᓂᐊᖅᑐᑦ ᐋᓐᓄᓗ ᐴᑉᒧᑦ, ᐊᖓᔪᖅᑳᖅ ᐱᔨᑦᑎᕋᖅᑕᐅᔪᓄᑦ ᐊᒻᒪ ᓂᐅᕐᕈᑎᖃᕐᓂᕐᒧᑦ. ᑕᒪᓐᓇ ᑲᑎᔾᔪᑕᐅᓂᐊᖅᑐᖅ ᐃᑲᕐᕋᕆᔭᐅᔪᑦ ᐊᒻᒪ ᓵᑕᐃᑦ ᓇᖕᒥᓂᖃᕐᓂᕐᒧᑦ ᑕᒡᕙᓃᑦᑐᐃᓐᓇᐅᓕᕐᓗᑎᒃ ᐋᖅᑭᒃᓱᖅᓯᒪᑦᑎᐊᕐᓂᖅᓴᐅᓗᑎᒃ ᑖᒃᑯᐊ ᒪᕐᕉᒃ ᐱᓕᕆᓂᐅᕙᒃᑑᒃ ᓇᖕᒥᓂᕆᔭᑦᑎᓐᓄᑦ. ᐋᓐᓄᓘᑉ ᓯᕗᓪᓕᐅᔾᔨᒍᒪᔭᖓᓕ ᑲᔪᓯᓂᖃᑦᑎᐊᑎᑦᑎᓂᕐᒥᑦ ᐊᒻᒪ ᐱᓕᕆᑦᑎᐊᕐᓂᕐᒥᑦ ᑕᒪᒃᑮᓐᓂᒃ ᐱᒻᒪᕆᐅᔪᓂᒃ ᐊᑐᖅᑕᐅᔪᓂᒃ.
ᐱᒋᐊᕈᑎᒋᓂᐊᖅᑕᖓ ᐅᓪᓗᖓ ᐊᓯᔾᔨᕈᑕᐅᓗᓂ ᓇᒡᒐᔾᔭᐅ, ᒪᐃ 30, 2022, ᐱᓕᕆᖃᑎᒌᑦ ᐱᓕᕆᖃᑎᒌᕙᓪᓕᐊᓕᖅᑐᑦ ᐊᐅᓚᓂᖃᑦᑎᐊᖁᓪᓗᒍ.
“ᒫᑦ ᐊᒻᒪ ᐋᓐᓄᓗ ᓴᙱᔫᓪᓗᑎᒃ ᓯᕗᓕᖅᑎᐅᔫᒃ ᓂᕆᐅᓂᖃᑦᑎᐊᖅᑐᖓᓗ ᐱᓕᕆᖃᑎᒋᓂᐊᕐᓗᒋᑦ ᐱᓕᕆᔨᐅᖃᑎᖏᓐᓂᓪᓗ ᐋᖅᑭᒋᐊᖅᓯᓂᕐᒥᑦ ᐊᒻᒪ ᓴᙱᓂᖅᓴᐅᓕᖅᑎᑦᑎᓂᕐᒥᑦ ᐊᐅᓚᓂᕆᔭᑦᑎᓐᓂᒃ ᐊᒻᒪ ᐱᔨᑦᑎᕋᑦᑎᐊᕐᓗᑕ ᐱᔨᑦᑎᕋᕐᕕᒋᔭᑦᑎᓐᓄᑦ,” ᐅᖃᖅᑐᖅ, ᐃᓕᓯᒪᑲᐃᓐᓇᖅᑐᖅ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᕋᓵᓐ ᑖᒻᓘᒡ.
-30-
ᑲᓇᐃᑎᐊᓐ ᓄᐊᑦ ᒥᒃᓵᓄᑦ:
ᑲᓇᐃᑎᐊᓐ ᓄᐊᑦ 100% ᐃᓄᖕᓂᑦ-ᓇᖕᒥᓂᖁᑎᒋᔭᐅᔪᖅ ᐊᒃᑐᐊᖃᑎᒌᒃᑎᑦᑎᓪᓗᓂ ᐃᓄᖕᓂᒃ ᐊᒻᒪᓗ ᐅᓯᑲᖅᑕᖅᐸᒃᖢᑎᒃ ᐊᑐᕆᐊᖃᓪᓚᕆᒃᑐᓂᒃ ᑲᓇᑕᐅᑉ ᐅᑭᐅᖅᑕᖅᑐᓗᒃᑖᖓᒍᑦ – ᐊᑦᑕᕐᓇᙱᑦᑐᒃᑯᑦ, ᑕᑎᒋᔭᐅᑦᑎᐊᕈᓐᓇᖅᖢᑎᒃ ᐊᒻᒪᓗ ᑐᙵᓇᐃᓐᓇᐅᔭᖅᖢᑎᒃ ᑲᒪᑦᑎᐊᖅᖢᑎᒡᓗ ᓂᐅᕕᖅᐸᒃᑐᓄᑦ ᐱᔨᑦᑎᕋᐅᑎᓂᒃ. ᑲᓇᐃᑎᐊᓐ ᓄᐊᑦ ᖃᖓᑕᓲᖏᑦ ᐱᔨᑦᑎᕋᖃᑦᑕᖅᑐᑦ 25 ᓄᓇᓕᖕᓂᑦ ᑕᐃᑲᓂ ᓄᓇᑦᓯᐊᕐᒥᑦ, ᓄᓇᕕᖕᒥᑦ ᐊᒻᒪᓗ ᓄᓇᕗᒻᒥᑦ, ᑕᐅᕙᓂᓗ ᐋᑐᕚᒥᑦ, ᒪᓐᑐᕆᐊᒥᑦ, ᐃᐊᑦᒥᓐᑕᓐᒥᓪᓗ ᓱᐴᔫᕐᓄᑦ 737−ᓂᒃ ᐊᒻᒪ ATR 42−ᓂᒃ ᖃᖓᑕᓲᖃᖅᖢᑎᒃ. ᑲᓇᐃᑎᐊᓐ ᓄᐊᑦᑯᑦ ᓵᑕᖅᑐᓕᕆᔨᐅᖕᒥᔪᑦ ᐊᖏᔪᓄᑦ ᐃᓛᒃᑰᖅᑐᓄᑦ ᐱᔨᑦᑎᕋᖅᑕᐅᔪᓄᑦ ᐊᑐᕈᒪᕙᒃᑐᓂᒃ ᓈᒻᒪᓈᖅᓯᒪᔪᓂᒃ, ᐊᑑᑎᖃᑦᑎᐊᖅᑐᓂᒃ ᐊᒻᒪᓗ ᐊᑭᑐᓗᐊᙱᖦᖢᓂ ᖃᖓᑕᓂᖅ/ᐊᐅᓪᓚᕐᓂᖅ ᖃᖓᑕᓗᓂ ᖃᖓᑕᕙᒃᖢᓂᓗ ᐊᒥᐊᓕᒐᐃᑦ ᐅᐊᖕᓇᖓᓄᑦ ᐅᖓᑖᓄᓪᓗ ᐱᙳᐊᖅᑎᓄᑦ, ᐅᒥᐊᕐᔪᐊᒃᑯᑦ ᑲᔾᔭᐅᓴᒃᑎᑦᑎᔨᓄᑦ, ᐳᓚᕋᖅᑎᓄᑦ ᐊᐅᓚᑦᑎᔨᓄᑦ ᐊᒥᓱᓄᓪᓗ ᐊᓯᖏᓐᓄᑦ. ᑲᓇᐃᑎᐊᓐ ᓄᐊᑦ ᐊᑕᖏᓗᒃᑖᖅᖢᒍ-ᓇᖕᒥᓂᕆᔭᐅᔪᖅ ᒪᑭᕕᒃ ᑯᐊᐳᕇᓴᓂᑦ ᐊᒻᒪᓗ ᐃᓄᕕᐊᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓂᑦ.
ᑐᓴᕆᐊᒃᑲᓐᓂᕈᒪᒍᑦᓯ, ᐊᑏ ᐅᖃᕐᕕᒋᓚᐅᖅᓯᐅᒃ:
ᑭᐊᕕᓐ ᖃᑉᓗᑦᓯᐊᖅ
ᑐᑭᒧᐊᖅᑎᑦᑎᔨᒻᒪᕆᒃ, ᑕᑯᒃᓴᐅᑎᑦᑎᓂᕐᒧᑦ ᐊᒻᒪ ᑐᓴᐅᒪᑎᑦᑎᓂᕐᒥᑦ
ᑲᓇᐃᑎᐊᓐ ᓄᐊᑦ
mediarelations@canadiannorth.com
