ᐅᐱᒋᕙᕗᑦ ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒃ (NACC), ᖁᕕᐊᓱᒍᑎᖃᑦᑐᑦ 40−ᖓᓂᒃ ᓇᓪᓕᐅᓂᔅᓯᐅᕈᑎᖃᓂᒻᒥᒃ ᑎᓯᐱᕆ 7−ᒥ.
ᑖᓐᓇ ᐱᕙᓪᓕᐊᒻᒪᕆᒋᐊᓕᓐᓂᖓᑕ ᖃᓄᐃᓘᕈᑎᒋᔭᐅᓂᖓ ᑎᑎᖅᓯᒻᒪᑦ ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᐅᑉ ᐱᒻᒪᕆᐋᓗᓐᓂᒃ ᐃᑲᔪᕈᑎᖃᓐᓂᖓ ᓄᓇᑦᓯᐊᒥᒃ ᓴᓇᙳᐊᒐᑦᑎᒍ, ᐃᓕᖅᑯᓯᒃᑯᑦ ᐊᒻᒪᓗ ᓄᓇᓕᒻᒥᒃ ᐱᓕᕆᖃᑎᖃᓂᖓᓄᑦ. ᑮᓇᐅᔭᓕᐅᕋᓱᐋᖏᑦᑐᖅ ᐃᑲᔪᕋᓱᐋᕈᑎᓕᔪᑦ ᐃᖅᑲᓇᐃᔭᕐᕕᖓ, ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒃ ᑖᓐᓇᑑᓪᓗᓂ ᑕᒪᐃᓐᓂᒃ ᐱᓕᕆᔾᔪᑎᖃᑦᑐᑑᒻᒪᑦ ᑕᑯᒃᓴᐅᓗᑎᒃ ᑕᑯᕋᓐᓈᑦᑕᐅᕕᑐᐋᖑᒻᒪᑦ ᓄᓇᑦᓯᐊᒻᒥ.
ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒃ ᑲᑎᕕᐅᖃᑦᑕᔅᓯᒪᓕᒻᒪᑦ ᐊᒻᒪᓗ ᐃᑲᔪᑦᑐᓂ, ᑕᑯᕋᓐᓈᕕᔅᓴᐅᑎᑦᑎᓪᓗᓂ, ᑐᓴᕋᓐᓈᕝᕕᔅᓴᐅᑎᑦᑎᓪᓗᓂ, ᒧᒥᕐᕕᐅᓪᓗᓂ ᐊᒻᒪᓗ ᐃᓕᓐᓂᐊᓂᓕᕆᓂᕐᒧᑦ ᑲᑎᒪᓯᓐᓈᕝᕕᐅᓪᓗᓂ, ᓴᓇᙳᐊᑦᑎᓄᑦ ᐊᔪᕈᓐᓃᔅᓴᑎᑦᑎᕕᐅᓪᓗᓂ ᐊᒻᒪᓗ ᐃᓕᓐᓂᐊᕈᑎᓕᕆᕕᐅᓪᓗᓂ ᒪᒃᑯᑦᑐᓄᑦ ᐊᒻᒪᓗ ᓄᓇᓕᒻᒥᐅᑕᐅᖃᑎᒋᔭᐅᔪᓄᑦ. ᐱᓕᕆᐊᖃᓪᓗᐋᑕᕋᓱᐊᒻᒪᑕ ᐱᕈᑦᑎᑦᑎᕙᓪᓕᐋᓇᓱᐊᑦᑐᑎᒃ ᓄᓇᓕᒥ ᑕᑯᕋᓐᓈᑦᑕᐅᓂᒻᒥᒃ ᖃᓄᐃᓘᓐᓂᕆᔭᐅᔪᓂᒃ ᐊᒻᒪᓗ ᐊᔪᕈᓐᓃᑉᐸᓪᓕᐊᑎᑦᑎᓇᓱᐊᑦᑐᑎᒃ ᐱᒃᑲᐅᓂᕆᔭᐅᔪᓂᒃ ᐱᓕᕆᑦᑎᐊᕈᓐᓇᑦᑎᑦᑎᓪᓗᑎᒃ, ᓴᖅᑭᑎᑦᑎᓗᑎᒃ, ᓴᓇᓗᑎᒃ ᐊᒻᒪᓗ ᑕᑯᔅᓴᐅᑎᑦᑎᓗᑎᒃ ᐱᓕᕆᐊᕆᔭᐅᒋᐋᕐᖓᔅᓯᒪᔪᓂᒃ ᐅᑭᐅᖅᑕᖅᑐᕐᒥ ᐊᒻᒪᓗ ᐅᖓᑖᓂᑦ.
ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒃ ᑕᑯᒃᓴᐅᑎᑦᑎᓲᖑᒻᒪᑦ ᐅᖓᑖᓂᑦᑐᓂᒃ 100 ᖃᓄᐃᓘᕈᑎᒋᔭᐅᔭᒃᑐᓂᒃ ᐊᑐᓂ ᐊᕐᕌᒍᓂ, ᑐᙵᓱᑦᑎᑦᑎᕙᒃᑐᑎᒃ ᖃᓂᒋᔭᒋᓐᓃᑦᑐᓂᒃ 20,000 ᐃᑲᔪᕈᑎᖃᑉᐸᒃᑐᓂᒃ ᓄᓇᑦᓯᐊᓕᒫᒻᒥ. ᐃᓕᓴᔾᔪᑎᑦ ᓂᕈᐊᑦᑕᐅᓲᖑᒻᒪᑕ ᐃᓕᓐᓂᐊᑦᑎᑦᑎᒍᑎᒋᔭᐅᒍᒪᓪᓗᑎᒃ ᐊᒻᒪᓗ ᖁᕕᐊᓱᑦᑎᑦᑎᒍᑎᒋᔭᐅᒍᒪᓪᓗᑎᒃ ᑭᒃᑯᓕᒫᓂᒃ ᐊᔾᔨᒌᖏᑦᑑᑎ ᐃᓄᒌᐋᓐᓂᓕᒪᖓᓂᒃ. ᑕᐃᒫᖑᓂᖓᓄᑦ, ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒃ ᐱᓕᕆᐋᖃᕐᒪᑦ ᖃᓄᐃᓘᕐᓂᓪᓗᐊᑕᕆᕙᒃᑕᒥᒃ ᐃᓕᖅᑯᓯᒻᒥ ᐃᓅᔅᓯᕆᔭᐅᕙᑦᑐᒥᒃ ᓄᓇᓕᒥᐅᑕᐅᖃᑎᒋᔭᐅᔪᓄᑦ ᑕᒫᓂ.
ᑲᓇᐃᑎᐊᓐ ᓄᐊᑦ ᐅᐱᒍᓱᑦᑎᐊᒻᒪᑦ ᑮᓇᐅᔭᖃᑦᑎᑦᑎᖃᑦᑕᓂᒻᒥᓂᒃ ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒻᒥᒃ ᐊᕐᕌᒍᒐᓚᓐᓂ, ᐃᑲᔪᑉᐸᓪᓗᓂᒋᑦ ᑕᒪᐅᙵᑦᑎᑦᑎᑎᓪᓗᒋᑦ ᓴᓇᙳᐊᑦᑎᓂᒃ, ᑕᑯᕋᓐᓈᑦᑎᑦᑎᔨᓂᒃ ᐊᒻᒪᓗ ᐱᓕᕆᔾᔪᑎᖏᓐᓂᒃ ᔨᐊᓗᓇᐃᑉᒧᑦ, ᐃᓅᕕᒻᒧᑦ, ᓄᐊᒪᓐ ᐅᐃᓪᔅᒧᑦ, ᐳᐊᑦ ᓯᒻᓴᓐᒧᑦ, ᕼᐃ ᕆᕙᒧᑦ ᐊᒻᒪᓗ ᐳᐊᑦ ᓯᒥᑦᒧᑦ. ᐃᑲᔪᓂᑦᑎᓐᓄᑦ ᒥᑭᓂᔅᓴᐅᓕᑦᑎᑕᐅᒻᒪᑕ ᐊᐅᓚᔾᔪᑎᖏᑕ ᐊᑭᖏᑦ, ᐃᑲᔪᓂᕆᔭᕗᑦ ᐱᒍᓐᓇᔅᓯᑎᑦᑎᖃᑦᑕᒻᒪᑕ ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᖓ ᐱᓕᕆᑦᑎᐊᕋᓱᐊᒍᓐᓇᓐᓂᔅᓴᐅᓕᓪᓗᓂ ᐊᖏᓕᒋᐋᔅᓯᓂᒻᒥᓂᒃ ᐱᓕᓴᔾᔪᑎᖏᓐᓂᒃ ᐊᒻᒪᓗ ᑎᑭᑦᑎᒍᓐᓇᔅᓯᓪᓗᑎᒃ ᓄᑖᓂᒃ ᑕᑯᕋᓐᓈᕆᐊᑦᑐᕈᒪᔪᓂᒃ.
ᑖᔅᓱᒪᓂ 40−ᐊᕐᕌᒍᓂ ᐱᕙᓪᓕᐋᒻᒪᕆᒋᐊᓕᓐᓂᖓᓂ, ᐅᐱᒋᑦᑎᐊᕈᓯᑦᑕᕗᑦ ᐱᔭᕇᔅᓯᓂᖏᑦ ᓄᓇᑦᓯᐊᑉ ᓴᓇᙳᐊᑦᑎᑦ, ᐃᑲᔪᕈᒪᕙᑦᑐᑦ, ᐃᖅᑲᓇᐃᔭᑦᑎᑦ, ᐃᑲᔪᕈᑎᖃᑉᐸᒃᑐᑦ, ᐱᓕᕆᖃᑎᒋᕙᒃᑕᕗᑦ ᐊᒻᒪᓗ ᑮᓇᐅᔭᖃᑦᑎᑦᑎᕙᑦᑐᑦ.
ᖃᐅᔨᒃᑲᓐᓂᕈᓐᓇᑦᑐᑎᑦ ᑕᒪᒃᑯᓂᖓ ᐅᑭᐅᖅᑕᖅᑐᕐᒥ ᓴᓇᙳᐊᒐᓐᓂᒃ ᐊᒻᒪ ᐃᓕᑯᓯᒻᒥᒃ ᑕᑯᔭᒐᖃᕐᕕᒻᒥᒃ ᑕᑯᒋᐊᓪᓗᒍ ᑖᒃᑯᐊ ᐃᑭᐊᕿᕕᖓ, ᐸᐃᔅᕗᒃᖓ ᐅᕝᕙᓘᓐᓃᑦ ᑕᑯᒃᓴᐅᑎᑦᑎᕕᖓ.
