ᑕᐃᒪᐃᖁᔭᐅᑎᓪᓗᒋᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ, ᐊᐅᓪᓚᖃᑦᑕᖅᑐᓄᓪᓗ ᑖᕗᖓ/ᑕᐃᑲᙵᑦ/ᐃᓗᐊᓂ ᓄᓇᕗᒻᒥ, ᑲᓇᐃᑎᐊᓐ ᓄᐊᑦ (Canadian North) ᖃᐅᔨᒪᑦᓯᐊᕆᐊᓲᑦ ᖃᖓᑕᓲᒃᑰᖅᑐᑦ ᐃᑦᓯᕚᖃᑎᒌᖃᑦᑕᕐᓗᑎᒃ ᑐᙵᕕᖃᕐᓗᑎᒃ ᓇᑭᑦ ᐃᑭᔭᖅᑐᕐᓂᖏᑦ ᒪᓕᓪᓗᒋᑦ. ᓲᕐᓗ, ᐊᐅᓪᓚᕆᐊᖅᑐᖅᑐᑦ ᐃᓄᑐᐊᒃᑯᕕᒻᒥᙶᖅᑐᑦ ᐃᑦᓯᕚᖃᑎᒌᑦᑎᑕᐅᓲᑦ ᐊᕕᑦᓯᒪᓪᓗᑎᒃ ᑎᑭᑎᑕᐅᒋᐊᖃᓪᓚᕆᑦᑐᓂᑦ ᐃᖅᑲᓇᐃᔭᖅᑎᓂᑦ ᐃᓄᑐᐊᒃᑯᕕᒻᒥᙶᓯᒪᙱᑐᐃᓐᓇᕆᐊᖃᖅᑐᓂᑦ.

ᑕᐃᒫᑦᓴᐃᓐᓇᖅ ᖃᖓᑕᓲᒃᑰᖃᑦᑕᖅᑐᑦ ᐊᒥᓲᓂᖏᑦ ᑲᔪᓯᑎᑐᐃᓐᓇᖅᑕᕗᑦ ᐊᐅᓪᓚᖃᑦᑕᖅᑐᑦ ᐅᐸᒍᑎᖁᓪᓗᒋᑦ ᐃᓄᓐᓄᑦ ᐊᒻᒪᓗ  ᓄᓇᓕᓐᓄᑦ ᐱᒻᒪᕆᐅᒋᔭᑦᓯᓐᓄᑦ. ᒪᓕᓪᓗᒍ ᓄᓇᕐᔪᐊᕐᒥ ᖃᖓᑕᓲᓄᑦ ᑲᑐᔾᔨᖃᑎᒌᓄᑦ (IATA), ᐊᒥᓲᓕᖅᑲᖓᔪᒃᑯᑦ ᐅᓗᕆᐊᓇᖅᑐᒦᑎᑦᓯᑦᑕᐃᓕᒪᓂᖅ ᐋᖅᑭᑦᓯᒪᔪᖅ ᖃᖓᑕᓂᐅᔪᓄᑦ ᑕᐃᒪᐃᑎᑦᓯᕗᖅ ᐃᑦᓯᕚᕐᓗᓂ ᓴᓂᒧᑦ ᑕᑕᑦᑐᒥᑦ ᐊᐅᓪᓚᕆᐊᖅᑐᖅᑐᓂᑦ ᓇᓕᒧᒋᕚ 7ᓂᒃ ᐃᓯᒐᓐᓂᒃ ᐅᖓᓯᓐᓂᖃᕐᓂᕐᒥᑦ ᐊᓯᓐᓂᑦ ᐃᓄᓐᓂᒃ ᐃᓯᖅᓯᒪᓗᓂ. ᖃᐅᔨᓴᕐᓂᕆᔭᖓᓄᑦ ᖃᐅᔨᒋᐊᒃᑲᓐᓂᕆᑦ ᐅᕙᓂ.

ᐃᓱᒪᒋᓗᒍ ᓄᕙᔾᔪᐊᕐᓇᖅ-19 ᐋᓐᓂᐊᕐᓇᖅᑐᖅ, ᑖᒃᑯᐊ ᖄᒃᑲᓐᓂᐊᒍᑦ ᖃᓄᐃᓕᐅᕈᑕᐅᔪᑦ ᐊᐅᓪᓚᕆᐊᖅᑐᖅᑐᑦ ᐊᒻᒪᓗ  ᐃᖅᑲᓇᐃᔭᖅᑎᐅᔪᑦ ᐊᑦᑕᕐᓇᖅᑐᒦᖁᓇᒋᑦ. ᐊᒥᓱᑦ ᖃᓄᐃᓕᐅᕈᑕᐅᔪᑦ ᐃᓕᓐᓂ ᐊᑦᑐᖅᓯᔪᑦ ᓇᓗᓇᐃᖅᑕᐅᓯᒪᔪᑦ ᑲᓇᐃᑎᐊᓐ ᓄᐊᑦ (Canadian North) ᑲᒪᑦᓯᐊᕐᓂᕐᒧᑦ ᓇᕿᑕᐅᒍᓐᓇᖅᑐᓂᑦ ᑕᕝᕙᓂ ᒪᑉᐱᖅᑐᒐᕐᒥ. ᖃᐅᔨᒃᑲᓐᓂᕋᔭᖅᑐᑎᑦ ᖃᓄᖅ ᐅᓗᕆᐊᓇᖅᑐᒦᑎᑦᓯᑦᑕᐃᓕᒪᒻᒪᖔᑦᑕ ᐊᐃᑦᑐᐃᓂᕐᒥᑦ ᖃᖓᑕᓲᒃᑯᑦ ᑕᕝᕙᓂ ᒪᑉᐱᖅᑐᒐᕐᒥ ᐊᒻᒪᓗ  ᐊᓯᖏᓐᓂᒃ ᓇᕿᑕᐅᒍᓐᓇᖅᑐᓂ.

ᐅᓗᕆᐊᓇᖅᑐᒦᓗᐊᑦᑕᐃᓕᒪᑎᑦᓯᓂᕐᒧᑦ ᐋᖅᑭᑦᓱᖅᓯᒪᔪᑦ ᖃᖓᑕᓲᒃᑰᖅᑐᖃᕐᓂᐊᖅᑎᓪᓗᒍ ᐃᓚᖃᖅᑐᖅ ᐊᒻᒧᑦ ᐊᓂᕐᓂᒥ ᓱᐴᖅᑎᑦᓯᓂᖏᓐᓂᒃ ᖃᖓᑕᓲᕐᒥᑦ, ᐊᓂᕐᓂᑦᓯᐊᕙᒻᒥ ᐃᓯᖅᑐᖃᐃᓐᓇᖅᑐᖅ ᖃᖓᑕᓲᑉ ᐃᓗᐊᓄᑦ, ᐊᐅᓪᓚᕆᐊᖅᑐᖅᑐᑦ ᐊᕕᑦᑐᖅᓯᒪᑎᑕᐅᔪᑦ ᐃᑦᓯᕙᐅᑕᕐᓄᑦ, ᐊᒻᒪᓗ  ᓇᒻᒥᓂᖅ ᓴᐳᒻᒥᔾᔪᑎᑦᓯᐊᕙᕆᔭᐃᑦ; ᒪᑐᐊᑦ.

ᖃᖓᑕᓗᓂ ᓴᓂᒧᑦ ᑕᑕᑦᑐᒥᑦ ᐊᐅᓪᓚᕆᐊᖅᑐᖅᑐᓂ ᓇᓕᒧᒋᕚ 7ᓂᒃ ᐃᓯᒐᓐᓂᒃ ᐅᖓᓯᓐᓂᖃᕐᓂᕐᒥᑦ ᐊᓯᓐᓂᑦ ᐃᓄᓐᓂᒃ ᐃᓯᖅᓯᒪᓗᓂ. ᖃᐅᔨᒋᐊᒃᑲᓐᓂᕆᑦ ᖃᓄᖅ ᐊᒥᓲᓕᖅᑲᖓᔪᒃᑯᑦ ᐅᓗᕆᐊᓇᖅᑐᒦᑎᑦᓯᑦᑕᐃᓕᒪᓂᖅ ᐊᐅᓚᓂᖃᓲᖑᒻᒪᖔᖅ ᖃᖓᑕᓲᕐᒥᑦ ᐅᕙᓂ IATA ᐃᑭᐊᖅᑭᕕᖓᓂ.

ᑭᓇᑐᐃᓐᓇᖅ ᓇᓗᓇᐃᖅᑕᐅᓯᒪᑉᐸᑦ ᓄᕙᔾᔪᐊᕐᓇᖅ-19ᒥ ᐋᓐᓂᐊᖃᖅᑐᖅ ᐱᔪᓐᓃᖅᓯᒪᓐᓂᕋᖅᑕᐅᙱᑉᐸᓪᓗ ᐋᓐᓂᐊᕈᑕᐅᔪᒥᒃ ᐃᑭᑎᑕᐅᖃᑦᑕᔾᔮᙱᑦᑐᑦ. ᖃᐅᔨᒪᐃᓐᓇᕈᓐᓇᙱᒃᑲᓗᐊᖅᑐᒍᑦ ᑭᓇ ᐋᓐᓂᐊᖃᕐᒪᖔᑦ, ᑭᓯᐊᓂ ᐋᓐᓂᐊᖃᖅᑕᐃᓕᒪᓂᕐᒧᑦ ᖃᐅᔨᓴᓲᖑᔪᒍᑦ ᐊᑐᓂ ᖃᖓᑕᓲᒃᑰᕐᓂᐊᖅᑐᓂᒃ ᑕᐃᒫᒃ ᑎᓕᐅᖅᑕᐅᓯᒪᒐᑦᑕ ᑖᒃᑯᓄᖓ ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐊᐃᑦᑐᐃᑦᑕᐃᓕᒪᖁᔨᓪᓗᑕ ᐊᒻᒪᓗ  ᒪᓕᑦᓯᐊᖅᑐᒍᑦ ᐅᑭᐅᖅᑕᖅᑐᒥ ᐊᕕᑦᓯᒪᓂᐅᔪᑦ ᒐᕙᒪᒃᑯᑦ ᐊᑐᐊᒐᖏᓐᓂᒃ. ᖃᐅᔨᒋᐊᒃᑲᓐᓂᕆᑦ ᑖᒃᑯᓄᖓ ᖄᒃᑲᓐᓂᐊᒍᑦ ᐊᒥᓲᓕᖅᑲᖓᔪᒃᑯᑦ ᐱᓇᓱᐊᖅᑕᐅᔪᓂᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐅᕙᓂ.

“44-ᑐᐃᓐᓇᕐᓂᒃ ᓴᖅᑭᑕᐅᓯᒪᔪᓂᑦ ᖃᖓᑕᓲᒃᑯᑦ ᓄᕙᔾᔪᐊᕐᓇᖅ-19−ᑖᖅᓯᒪᔪᑦ ᖃᖓᑕᓲᒃᑯᑦ 1.2 ᐱᓕᐊᓐ ᖃᖓᑕᓲᒃᑰᖅᑎᓪᓗᒋᑦ [2020-ᒥ], ᐅᓗᕆᐊᓇᕐᓂᖓ ᐋᓐᓂᐊᖅᑖᕐᓂᒧᑦ ᖃᖓᑕᓲᒃᑯᑦ ᑕᐃᒫᑦᓴᐃᓐᓇᐅᕗᖅ ᓲᕐᓗ ᑲᓪᓕᖅᑕᐅᓗᓂ ᐃᑭᓪᓛᔪᒧᑦ,” ᐅᖃᖅᑐᖅ ᐋᓐᑐᕋᐃ ᑎ ᔪᓂᐊᒃ, ᐊᖏᔪᖅᑳᕐᒪᕆᒃ ᐊᒻᒪᓗ  ᐊᐅᓚᑦᓯᔨᒻᒪᕆᒃ ᑖᒃᑯᓄᖓ IATA.

ᑲᓇᐃᑎᐊᓐ ᓄᐊᑦᑯᑦ (Canadian North) ᒪᓕᑦᓯᖅᐊᖅᐸᑦᑐᑦ ᐊᑐᓕᖁᔭᐅᓯᒪᔪᓕᒫᓂᒃ ᐃᖅᑲᓇᐃᔭᖅᑏᑦ ᐊᒻᒪᓗ  ᖃᖓᑕᓲᒃᑰᖅᑐᑦ ᐊᑦᑕᕐᓇᖅᑐᒦᖁᓇᒋᑦ.

ᖃᖓᑕᓲᒃᑰᖅᑐᓕᒫᑦ ᑐᓂᔭᐅᓲᑦ ᑲᓇᐃᑎᐊᓐ ᓄᐊᑦ (Canadian North) ᑲᒪᑦᓯᐊᕐᓂᕐᒧᑦ ᐴᖅᑲᖅᓯᒪᔪᓂᑦ ᐃᓗᓕᖃᖅᑐᓂᒃ ᒪᑐᐊᕐᒥᒃ, ᖁᐱᕐᕈᐃᔭᐅᑎᒥᒃ ᒥᖑᐊᕈᒻᒥᒃ, ᐊᒻᒪᓗ  ᖁᐱᕐᕈᐃᔭᐅᑎᓂᒃ ᐊᓪᓚᕈᑎᕋᓛᒃᓂᒃ ᓇᒻᒥᓂᖅ ᐊᑦᑕᕐᓇᖅᑐᒦᙱᓐᓂᖅᓴᐅᓂᐊᕋᕕᑦ ᐊᒻᒪᓗ  ᐅᓗᕆᐊᓇᙱᓐᓂᖅᓴᐅᓂᐊᕐᒪᑦ ᑎᒥᓐᓄᑦ. ᐃᒪᐃᓕᐅᖁᔨᕗᒍᑦ:

• ᐊᓪᓚᖅᑎᖃᑦᑕᕐᓗᒋᑦ ᐊᑦᑐᖅᑕᐅᖃᑦᑕᖅᑐᑦ ᖄᖏᑦ ᖁᐱᕐᕈᐃᔭᖅᑕᐅᓚᐅᖅᑑᒐᓗᐊᑦ ᖃᖓᑕᓲᒃᑰᓚᐅᙱᑦᑎᓪᓗᑎᑦ
• ᒪᑐᐊᑦ ᕿᓚᒥᑯᓗᒃ ᐲᑲᐃᓐᓇᖃᑦᑕᕐᓗᒍ ᐃᒥᕐᓂᐊᓕᕈᕕᑦ ᐃᒥᕐᒥᒃ ᐅᕝᕙᓘᓐᓃᑦ ᓂᕆᓂᐊᓕᕈᕕᑦ
• ᑕᒧᓗᒐᑦᓴᓂᒃ ᓇᑦᓴᖃᑦᑕᕐᓗᑎᑦ ᐊᒡᒐᓐᓄᑦ ᐅᕝᕙᓘᓐᓃᑦ ᐊᓘᑎᕈᔪᓐᓄᑦ ᐊᑐᕆᐊᖃᙱᑦᑐᓂᑦ (ᖃᖓᑕᓲᕐᒥ ᓂᕆᑎᑦᓯᓂᐅᕙᑦᑐᖅ ᓄᖅᑲᖓᑲᐃᓐᓇᖅᑐᖅ ᐃᒥᕐᓂᒃ  ᒥᓕᓕᓐᓂᒃ ᑭᓯᐊᓂ ᐊᑐᐃᓐᓇᐅᑎᑦᓯᓪᓗᑎᑦ)
• ᐊᑐᕆᐊᑦᓯᐊᕐᓗᑎᑦ ᐊᑐᓕᖁᔭᐅᓯᒪᔪᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐃᕝᕕᑦ ᖃᐅᑕᒫᑦ ᐊᑐᖃᑦᑕᖅᑕᓐᓂᒃ

ᑖᒃᑯᐊᑦᓴᐃᓐᓇᐃᑦ ᐊᒥᓲᓕᖅᑲᖓᔪᒃᑯᑦ ᐅᓗᕆᐊᓇᖅᑐᒦᑎᑦᓯᑦᑕᐃᓕᒪᓂᕐᒧᑦ ᐊᑐᓕᖁᔭᐅᓯᒪᔪᑦ ᑐᕌᖓᒻᒥᔪᑦ ᓯᐊᒻᒪᓗ ᑦᑕᐃᓕᒪᑎᑦᓯᓂᕐᒥᑦ ᓄᕙᔾᔪᐊᕐᓇᖅ-19ᒥ ᐊᒻᒪᓗ  ᐊᔾᔨᒌᙱᑦᑑᑕᐅᓂᖏᓐᓄᑦ.

ᐄ. ᒪᓕᓪᓗᒍ ᑖᓐᓇ ᓄᕙᔾᔪᐊᕐᓇᖅᑐᒧᑦ ᖃᐅᔨᓴᕐᓂᐅᔪᖅ ᕼᐋᕙᑦ ᓯᓚᑦᑐᖅᓴᕐᕕᔾᔪᐊᖓᓂ, ᐊᑐᕆᐊᖃᓪᓚᕆᓐᓂᕐᒥᑦ ᑮᓇᕐᒧᑦ ᒪᑐᐊᕐᓂᒃ ᐱᒻᒪᕆᐅᓛᖑᔪᖅ ᐋᖅᑭᑦᓱᖅᓯᒪᔪᓂ ᐊᐃᑦᑐᐃᑦᑕᐃᓕᒪᓂᕐᒧᑦ ᑖᒃᑯᓂᖓ ᐊᓂᕐᓂᒃᑰᓲᓂᑦ ᐋᓐᓂᐊᓂᑦ ᖃᖓᑕᓲᒦᓂᕐᓂ.

ᐊᑦᑐᐊᔭᐅᒐᔪᓐᓃᖅᐹᖑᔪᑦ ᖁᐱᕐᕈᐃᔭᖃᑦᑕᖅᑕᕗᑦ ᐋᓐᓂᐊᕕᒃᓯᐅᑎᓄᑦ ᓴᓗᒻᒪᖅᓴᐅᑎᕐᔪᐊᓄᑦ ᖃᖓᓕᒫᖅ ᐊᐅᓪᓚᖅᑐᖃᓚᐅᖏᓐᓂᖓᓂ (ᐊᐅᓪᓚᕆᐊᖅᑐᖅᑐᑦ ᐃᑭᒐᐃᒻᒪᑕ ᐊᒻᒪᓗ  ᓂᐅᒐᐃᒻᒪᑕ, ᖃᖓᑕᓂᐅᔪᓪᓗ ᐊᒥᓱᓄᑦ ᓄᖅᑲᑦᑕᖅᑐᓂᑦ ᐊᒻᒪᓗ  ᐊᐅᓪᓚᖃᑦᑕᕐᓃᓪᓗ ᐊᑯᓐᓂᖓᒍᑦ). ᖃᖓᑕᓲᖅ ᐳᔪᖅᑎᕐᕕᐅᓲᖅ ᓂᐱᒍᑎᖃᖅᑐᒥᒃ ᑎᒻᒥᒃᑳᓲᒧᑦ ᐊᒻᒪᓗ  ᓴᓗᒻᒪᖅᓴᖅᑕᐅᓲᖑᓪᓗᓂ ᓴᓗᒻᒪᖅᓴᐃᔨᒻᒪᕆᓐᓄᑦ ᖃᖓᑕᓚᐅᖅᑎᓪᓗᒋᑦ ᐅᓪᓘᑉ ᐃᓱᐊᓂ.