ᑐᓴᕋᑦᓴᓕᐊᖑᑦᓴᐅᑎᒋᔪᑦᓴᖅ, ᑎᓯᐱᕆ 17, 2021 (ᐋᑐᕚ, ᐋᓐᓂᐅᕆᔫ) – ᑲᓇᐃᑎᐊᓐ ᓄᐊᑦ ᐱᔭᕇᕋᑖᓚᐅᖅᑐᑦ ᑲᔪᓯᑦᓯᐊᕐᓂᖃᓚᐅᖅᑐᒥ ᐱᙳᐊᕐᓂᒃ ᐸᔪᑦᑎᕆᓂᒃᑯᑦ ᐸᔪᑦᑕᐅᓪᓗᑎᑦ ᓄᑕᖅᑲᐃᑦ ᓄᓇᓕᖏᓐᓂ ᑭᒻᒥᕈᑦ, ᑲᖏᖅᑐᒑᐱᒃ ᐊᒻᒪᓗ ᑕᓗᕐᔪᐊᖅ ᓄᓇᕗᒻᒥ. ᓯᑕᒪᖓᓐᓂ ᐊᕐᕌᒍᕐᒥ ᐊᐅᓚᓂᖃᓕᖅᑎᓪᓗᒍ ᑕᒪᓐᓇ ᐱᒋᐊᖅᑎᑕᐅᓯᒪᔪᖅ, ᑲᓇᐃᑎᐊᓐ ᓄᐊᑦᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᒋᔭᖏᓪᓗ, ᐱᖃᓯᐅᓪᓗᑎᑦ ᑲᓇᑕ ᒎᔅᑯᑦ (Canada Goose) ᐊᒻᒪᓗ ᒫᔅᑐᒪᐃᓐ ᐱᙳᐊᑦ (Mastermind Toys), ᑲᑎᖅᓱᐃᓚᐅᖅᑐᑦ $17,000ᓂᒃ ᑕᒪᑐᒧᖓ, ᑮᓇᐅᔭᐃᑦ ᓂᐅᕕᕈᑕᐅᓪᓗᑎᑦ ᓄᑖᕐᓂᒃ ᐱᙳᐊᕐᓂᒃ ᒫᔅᑐᒪᐃᓐ ᐱᙳᐊᑯᑦ ᓂᐅᕕᕐᕕᖓᓂ ᐋᑐᕚᒥ ᐊᑦᒪᑕᓐᒥᓪᓗ.
ᐊᐃᑉᐱᐅᕋᑖᓚᐅᖅᑐᒥ, ᑎᓯᐱᕆ 14, 2021, ᑲᓇᐃᑎᐊᓐ ᓄᐊᑦᑯᑦ ᐃᖅᑲᓇᐃᔭᖅᑎᖏᑦ, ᓄᓇᖃᖅᑐᑦ ᐸᓖᓯᒃᑯᓪᓗ ᐸᔪᑦᑎᕆᓚᐅᖅᑐᑦ ᐱᙳᐊᕐᓂᒃ ᐃᓚᒌᑦᑐᓄᑦ ᑭᒻᒥᕈᕐᒥ. ᐱᙳᐊᑦ ᐸᔪᑦᑎᖅᑕᐅᖃᑦᑕᓚᐅᖅᑐᑦ ᒪᑐᖏᓐᓄᑦ ᐃᖅᑲᓇᐃᔭᖅᑏᑦ ᒪᑐᐊᖅᓯᒪᓪᓗᑎᑦ ᐊᑦᑕᓇᖅᑐᒦᖁᓇᒋᑦ ᓄᓇᖃᖅᑐᑦ. ᐱᙳᐊᕐᓂᒃ ᐸᔪᑦᑎᕆᓃᑦ ᐊᑐᖅᑕᐅᓚᐅᕐᒥᔪᑦ ᑕᓗᕐᔪᐊᕐᒥ ᑲᖏᖅᑐᒑᐱᒻᒥᓗ ᑕᒡᕙᓂ ᐱᓇᓱᐊᕈᓯᑦᑎᓐᓂ.
“ᑕᒪᓐᓇ ᐱᒻᒪᕆᐅᑐᐃᓐᓇᙱᑦᑐᖅ ᓄᑕᖅᑲᓄᑦ ᑕᒪᒃᑯᓇᓂ ᓄᓇᓕᓐᓂ, ᐱᕕᑦᓴᖃᖅᑎᑦᓯᕙᒻᒥᔪᖅ ᐃᖅᑲᓇᐃᔭᖅᑎᖁᑎᕗᑦ ᑐᓂᓯᒍᓐᓇᖁᓪᓗᒋᑦ”. ᐅᖃᓚᐅᖅᑐᖅ ᓯᐊᓕ ᑎᑭᐊᕆᔭ, ᖁᑦᓯᓂᖅᓴᖅ ᑐᑭᒧᐊᑦᑎᑦᓯᔨ, ᓂᐅᕕᐊᑦᓴᓕᕆᓂᕐᒧᑦ ᓄᓇᓕᓐᓂᓪᓗ ᐃᑲᔪᕆᐊᕈᑎᓄᑦ. “ᐊᒥᓱᑦ ᐱᙳᐊᑦ ᓂᐅᕕᐊᑦᓴᐅᔪᑦ ᐱᑕᖃᖅᐸᙱᑦᑐᑦ ᓄᓇᑦᑎᓐᓂ, ᑕᒪᓐᓇ ᐱᐅᒍᑎᒋᒃᑲᓐᓂᖅᑐᓂᐅᒃ ᓄᑕᖅᑲᓄᑦ”.
“ᐱᒍᐊᕐᓂᖅ ᐸᔪᑦᑎᕆᓂᖅ ᐃᖅᑲᐃᑎᑦᓯᕗᖅ ᐅᕙᑦᑎᓐᓂᒃ ᐱᓇᓱᐊᕈᑎᒋᔭᑦᑎᓐᓂ ᐱᕚᓪᓕᕆᐊᕐᓗᒋᑦ ᐃᓅᓯᖏᑦ ᓄᓇᓖᑦ ᐱᔨᑦᓯᖅᐸᑦᑕᑦᑕ,” ᐅᖃᓚᐅᖅᑐᖅ ᑯᕆᔅ ᐊᐃᕗᕆ, ᑲᓇᐃᑎᐊᓐ ᓄᐊᑦᑯᑦ ᐊᖏᔪᖅᑳᖓᑦ. “ᐊᕐᕌᒍᑕᒫᑦ ᓂᕆᐅᓐᓂᖃᖅᐸᑦᑐᒍᑦ ᐱᙳᐊᕐᓂᒃ ᐸᔪᑦᑎᕆᓂᒃᑯᑦ ᓴᖅᑭᔮᖅᑎᒋᐊᖅᑐᒍ ᓄᓇᓕᑦᑎᓐᓄᑦ ᐃᑉᐳᒍᓱᑦᓯᐊᕐᓂᖃᕋᑦᑕ ᓴᖅᑭᔮᖅᑎᑦᑐᒍᓪᓗ ᐃᖅᑲᓇᐃᔭᖅᑎᑦᑎᓐᓄᑦ ᐃᑲᔪᕐᓂᖏᑦ ᐊᑦᑐᐃᓂᖃᓪᓚᕆᑉᐸᒋᐊᖏᑦ ᑕᒪᒃᑯᓂᖓ ᓄᑕᖅᑲᓂᒃ.”
ᓇᐃᑦᑐᖅ ᑕᕐᕆᔮᑦᓴᖅ ᑕᒪᑐᒪᓂ ᐊᕐᕌᒍᑦᑎᓐᓂ ᑲᓇᐃᑎᐊᓐ ᓄᐊᑦᑯᑦ ᐱᙳᐊᕐᓂᒃ ᐸᔪᑦᑎᕆᓂᖓ ᓴᖅᑭᖅᑎᑕᐅᓛᖅᑐᖅ ᔭᓐᓄᐊᕆ 2022ᒥ.
-30-
ᒥᑦᓵᓅᖓᔪᑦ ᑲᓇᐃᑎᐊᓐ ᓄᐊᑦ (Canadian North):
ᑲᓇᐃᑎᐊᓐ ᓄᐊᑦ (Canadian North) 100%−ᖑᓪᓗᓂ ᐃᓄᓐᓄᑦ ᓇᒻᒥᓂᕆᔭᐅᔪᖅ ᑲᓱᖅᑎᕆᕙᑦᑐᓂ ᐃᓄᓐᓂᒃ ᐱᔭᐅᒋᐊᖃᓪᓚᕆᑦᑐᓂᓪᓗ ᓱᓇᒃᑯᑖᕐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ − ᐊᑦᑕᓇᙱᑦᑐᒃᑯᑦ, ᑐᙵᕕᐅᒍᓐᓇᖅᑐᒃᑯᑦ ᑕᐃᒪᙵᓕᒫᕐᓗ ᑐᙵᓇᕐᓂᒃᑯᑦ ᐃᑲᔪᕈᒪᐃᓐᓇᕐᓂᒃᑯᓪᓗ ᐱᔨᑦᓯᖅᑕᒥᓐᓂ. ᐊᐅᓚᓂᖃᖅᐸᑦᑐᖅ 26ᓄᑦ ᐅᐸᒐᑦᓴᐅᔪᓄᑦ ᓄᓇᑦᓯᐊᕐᒥ, ᓄᓇᕕᒻᒥ ᐊᒻᒪᓗ ᓄᓇᕗᒻᒥ, ᖃᓪᓗᓈᑦ ᓄᓇᖏᓐᓂ ᑐᑦᑕᕐᕕᖃᖅᑐᑎᑦ ᐋᑐᕚᒥ, ᒪᓐᑐᕌᒥ ᐊᒻᒪᓗ ᐊᑦᒪᑕᓐᒥ, ᐊᔾᔨᒌᙱᑦᑐᓂᒃ ᖃᖓᑕᓲᖁᑎᖃᖅᑐᑎᑦ ᕘᐃᖕ (Boeing 737) ᐊᒻᒪᓗ ATR 42 ᖃᖓᑕᓲᕐᓂᒃ. ᑲᓇᐃᑎᐊᓐ ᓄᐊᑦ (Canadian North) ᑦᓵᑕᕐᓂᒃᑯᑦ ᐱᔨᑦᓯᕋᖅᐸᑦᑐᑦ ᐊᖏᔫᑎᓄᑦ ᐱᓕᕆᕕᐅᔪᓄᑦ ᐱᔨᑦᓯᖅᑕᐅᒋᐊᓕᓐᓄᑦ ᑐᙵᕕᖃᕐᓂᒃᑯᑦ, ᐱᐊᓚᐃᑦᑐᒃᑯᑦ ᐊᑭᑐᓗᐊᙱᑦᑐᓂᓪᓗ ᑎᑭᑦᑕᕐᕕᖃᖅᑐᑦ/ᐊᐅᓪᓚᖅᑕᕐᕕᖃᖅᑐᑦ ᐊᐅᓚᑦᓯᕙᑦᑐᓂᓪᓗ ᖃᖓᑕᓲᕐᓂᒃ ᐅᐊᓐᓇᖓᓐᓂ ᒥᐊᓕᒐᐅᑉ ᓄᓇᓕᕐᔪᐊᖓᑦᑕ ᐅᖓᑖᓄᓪᓗ ᐱᙳᐊᖅᑎᐅᔪᓄᑦ, ᐅᒥᐊᕐᔪᐊᓄᑦ ᐳᓚᕋᖅᑎᓄᑦ, ᐳᓚᕋᖅᑐᓕᕆᔨᓄᑦ ᐊᓯᖏᓐᓄᓪᓗ ᐊᒥᓲᓂᖃᖅᑐᓄᑦ ᑲᑎᙵᔪᓄᑦ. ᑲᓇᐃᑎᐊᓐ ᓄᐊᑦ (Canadian North) ᐊᑕᖏᖅᑐᒍ−ᓇᒻᒥᓂᕆᔭᐅᔪᖅ ᒪᑭᕕᒃ ᑯᐊᐸᕇᓴᒃᑯᓐᓄᑦ (Makivik Corporation) ᐊᒻᒪᓗ ᐃᓄᕕᐊᓗᐃᑦ ᐊᕕᑦᑐᖅᓯᒪᔪᖏᓐᓂ ᑯᐊᐸᕇᓴᖏᓐᓄᑦ (Inuvialuit Development Corporation).
ᑐᑭᓯᒋᐊᕈᑎᑦᓴᓄᑦ, ᑐᓴᕆᐊᕐᕕᒋᓗᒍ:
ᑭᐊᕙᓐ ᖃᑉᓗᑦᓯᐊᖅ
ᖁᑦᓯᓂᖅᓴᖅ ᑐᑭᒧᐊᑦᑎᑦᓯᔨ, ᓂᐅᕕᐊᑦᓴᓕᕆᓂᕐᒧᑦ ᑐᓴᐅᒪᔾᔪᑎᓕᕆᕐᒧᓪᓗ
ᑲᓇᐃᑎᐊᓐ ᓄᐊᑦ
mediarelations@canadiannorth.com
