Skip to content

ᑲᓇᐃᑎᐊᓐ ᓄᐊᑦ (Canadian North) ᑐᓴᖅᑎᑦᓯᒍᑎᖃᖅᑐᑦ ᐊᑕᐅᓯᐅᓕᕐᓂᖓᓂᒃ ᖃᖓᑕᓲᓕᕆᒍᓐᓇᐅᑎᓄᑦ ᐸᐃᑉᐹᖁᑎᑖᖅᓯᒪᓕᕐᓂᖏᓐᓂᒃ ᖃᖓᑕᓲᓕᕆᓂᕐᒧᑦ ᓇᓗᓇᐃᒃᑯᑕᖃᓕᕐᓂᖓᓂᓪᓗ

ᑐᓴᖅᑎᑦᓯᒍᑎᐅᑦᓴᐅᑎᒋᔪᑦᓴᖅ, ᒪᐃ 26, 2021 – ᑲᓇᐃᑎᐊᓐ ᓄᐊᑦ (Canadian North) ᐊᐅᓚᓂᖃᕐᓂᐊᓕᖅᑐᖅ ᐊᑕᐅᓯᕐᒥᒃ ᖃᖓᑕᓲᓕᕆᒍᓐᓇᐅᑎᖃᕐᓗᑎᑦ ᐸᐃᑉᐹᖁᑎᒥᒃ (AOC), ᐊᑐᖔᓕᖅᑐᑎᑦ ᓄᑖᕐᒥᒃ ᖃᖓᑕᓲᓕᕆᓂᕐᒧᑦ ᓇᓗᓇᐃᒃᑯᑕᕐᒥᒃ, ᑕᐃᔭᐅᔪᖅ ᐋᒃᑎᒃ (ARCTIC), ᐊᒻᒪᓗ ᐱᖓᓱᑦ ᑎᑎᖅᑲᑦ ᓇᓗᓇᐃᒃᑯᑕᕆᓕᖅᑐᓂᐅᒃ, AKT, ᖃᖓᑕᓂᐅᔪᓕᒫᕐᓄᑦ. ᖃᖓᑕᓲᓕᕆᓂᕐᒧᑦ ᓇᓗᓇᐃᒃᑯᑕᕆᓚᐅᖅᑕᖏᒃ ᐊᒻᐳᕋᔅ (EMPRESS) ᐊᒻᒪᓗ ᕘᔅ ᐃᐊᕐ (FIRST AIR) ᐊᑐᖅᑕᐅᒍᓐᓃᖅᑑᒃ.

ᑕᖅᑮᑦ 18 ᐊᓂᒍᖅᑐᓂ, ᑲᓇᐃᑎᐊᓐ ᓄᐊᑦᑯᑦ (Canadian North) ᖃᖓᑕᓲᑦ ᐊᐅᓪᓚᑕᐅᓂᖃᓚᐅᕐᒪᑕ ᒪᕐᕉᓐᓂᒃ ᑲᓲᑎᓯᒪᙱᑦᑑᓐᓂᒃ ᖃᖓᑕᓲᕆᒍᓐᓇᐅᑏᓐᓂᒃ ᐸᐃᑉᐹᖁᑏᓐᓂᒃ ᓯᕗᓂᐊᒍᑦ ᓇᒻᒥᓂᖃᖅᑎᐅᓚᐅᖅᑐᑦ, ᑲᓇᐃᑎᐊᓐ ᓄᐊᑦ (Canadian North) ᐊᒻᒪᓗ ᕘᔅ ᐃᐊᕐ (First Air). ᑲᑎᑕᐅᓂᖓ ᐊᑕᐅᓯᐅᓕᖅᑐᓂ ᖃᖓᑕᓲᓕᕆᒍᓐᓇᐅᑎᓄᑦ ᐸᐃᑉᐹᖁᑎ ᑕᒪᓐᓇ ᐅᔾᔨᕐᓇᓪᓚᕆᑦᑐᒥᒃ ᑎᑭᐅᑎᓂᐅᕗᖅ, ᐱᒍᓐᓇᖅᑎᑦᓯᓪᓗᓂ ᑲᓇᐃᑎᐊᓐ ᓄᐊᑦᑯᓐᓂᒃ (Canadian North) ᐱᔨᑦᓯᕋᐅᑎᖃᓕᖅᑐᑎᑦ ᑲᑎᑕᐅᓯᒪᑦᓯᐊᓕᖅᑐᓂᒃ ᐊᐅᓚᑦᓯᓂᕐᒧᑦ ᒪᓕᑦᑕᐅᒋᐊᓕᓐᓂᒃ ᐊᑐᐊᒐᖏᓪᓗ.

ᑖᓐᓇ ᑕᐃᒎᓯᖓ ᐋᒃᑎᒃ (ARCTIC) ᖃᖓᑕᓲᓕᕆᓂᕐᒧᑦ ᓇᓗᓇᐃᒃᑯᑕᖅ ᐃᖅᑲᐃᑎᑦᓯᒋᐊᕈᑎᐅᕗᖅ ᐃᓗᓕᖃᓪᓚᕆᑦᑐᓂᒃ ᐊᑐᖅᓯᒪᔭᖏᓐᓂ ᖃᖓᑕᓲᓕᕆᓂᒃᑯᑦ ᐅᑭᐅᖅᑕᖅᑐᒥ, ᐊᑐᓂ ᓯᕗᓂᐊᒍᑦ ᓇᒻᒥᓂᖃᖅᑎᐅᓯᒪᓂᖏᑕ ᐱᓕᕆᐊᑦᓴᕆᓯᒪᔭᖏᑦ ᑲᓇᐃᑎᐊᓐ ᓄᐊᑦ (Canadian North) ᐱᓕᕆᐊᕇᓐᓇᕐᓂᐊᖅᑕᖏᑦ ᓯᕗᓂᑦᓴᑎᓐᓂ: ᐱᔨᑦᓯᕋᖅᑎᓪᓚᕆᐅᓂᒃᑯᑦ ᐱᔭᐅᒋᐊᖃᓪᓚᕆᑦᑐᓂ ᓄᓇᓕᓐᓄᑦ, ᑲᓱᖅᑎᕆᓪᓗᑎᑦ ᐃᓄᓐᓂᒃ ᐅᑭᐅᖅᑕᖅᑐᓕᒫᕐᒥ ᑲᓲᑎᑎᑦᓯᒋᐅᕐᓂᒃᑯᓪᓗ ᐱᐅᓪᓚᕆᓐᓂᖓᑕ ᐅᑭᐅᖅᑕᖅᑐᒥ ᓄᓇᓖᑦ ᓄᓇᕐᔪᐊᓕᒫᕐᒦᑦᑐᓄᑦ. ᓇᓗᓇᐃᖅᓯᒍᑕᐅᒻᒥᔪᖅ ᒪᑭᑕᒋᐊᓪᓚᕆᖃᑦᑕᖅᓯᒪᓂᖏᓐᓄᑦ ᑐᙵᓇᕐᓂᒃᑯᓪᓗ ᐱᔨᑦᓯᕋᖅᐸᓐᓂᕐᒥ, ᐱᕚᓪᓕᕆᐊᖅᑕᐅᓯᒪᓪᓗᓂ ᐅᑭᐅᖅᑕᖅᑐᖓᓂ ᑲᓇᑕᐅᑉ ᖃᐅᑕᒫᓪᓗ ᒪᓂᒻᒥᖅᑕᐅᕙᑦᑐᑎᑦ ᐃᖅᑲᓇᐃᔭᖅᑎᐅᕙᑦᑐᑦ ᐱᔨᑦᓯᖅᑕᐅᔪᑦ ᐃᖅᑲᓇᐃᔭᖅᑏᑦ ᑦᓵᑕᖅᑕᐅᕙᓐᓂᖏᓐᓂ ᐱᖓᓐᓇᖓᓂ ᑲᓇᑕᐅᑉ ᑕᐅᕗᖓᒋᐊᒃᑲᓐᓂᕐᓗ

ᑯᕆᔅ ᐊᐃᕗᕆ (Chris Avery), ᐃᑦᓯᕙᐅᑕᖓᑦ ᐊᒻᒪᓗ ᑐᑭᒧᐊᑦᑎᑦᓯᔨᒻᒪᕆᖓᑦ, ᐅᖃᓚᐅᖅᑐᖅ “ᐅᓂᒃᑳᒐᑦᓴᖃᓪᓚᕆᑦᑐᓂ ᐊᑐᖅᓯᒪᔭᖏᑦ ᑲᓇᐃᑎᐊᓐ ᓄᐊᑦᑯᑦ (Canadian North) ᐊᒻᒪᓗ ᕘᔅ ᐃᐊᕐ (First Air) ᐃᓗᓕᖃᓪᓚᕆᑦᑐᖅ ᐃᖅᑲᐅᒪᓇᓪᓚᕆᑦᑐᓂᓪᓗ. ᖁᕕᐊᒋᓗᒍ ᑭᖑᓂᑦᑎᓐᓂ ᐊᑐᖅᓯᒪᔭᑦᑕ ᐃᓱᒪᒋᓗᒍ, ᖁᓚᓈᖅᑯᖓ ᓯᕗᓂᑦᓴᑎᓐᓂ ᐊᑕᐅᓯᐅᓂᐊᕐᓂᖓ ᖃᖓᑕᓲᓕᕆᓂᕐᒧᑦ ᓇᓗᓇᐃᒃᑯᑕᖅ ᑕᐃᔭᐅᓂᐊᓕᕐᓂᖓ “ᐋᒃᑎᒃ” (ARCTIC). ᑲᔪᖏᖅᑐᖅᑕᐅᕙᑉᐳᖓ ᖁᕕᐊᒋᓪᓚᕆᑉᐸᑦᑐᒋᓪᓗ ᖃᐅᑕᒫᑦ ᐃᖅᑲᓇᐃᔭᖅᑎᑦᑕ ᐱᔨᑦᓯᕈᓐᓇᐸᓐᓂᖏᓐᓂ ᑲᓇᑕᓕᒫᕐᒥ ᓂᕆᐅᒋᔭᐅᒍᑎᒋᕙᑦᑐᑎᒍᓪᓗ. ᐊᑐᖅᐸᓪᓕᐊᕗᒍᑦ ᓄᑖᕐᒥᒃ ᐅᓂᒃᑳᑦᓴᐅᓂᐊᖅᑐᒥ.”

-30-

ᒥᑦᓵᓅᖓᔪᑦ ᑲᓇᐃᑎᐊᓐ ᓄᐊᑦ (Canadian North):
ᑲᓇᐃᑎᐊᓐ ᓄᐊᑦ (Canadian North) 100%−ᖑᓪᓗᓂ ᐃᓄᓐᓄᑦ ᓇᒻᒥᓂᕆᔭᐅᔪᖅ ᑲᓱᖅᑎᕆᕙᑦᑐᓂ ᐃᓄᓐᓂᒃ ᐱᔭᐅᒋᐊᖃᓪᓚᕆᑦᑐᓂᓪᓗ ᓱᓇᒃᑯᑖᕐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ − ᐊᑦᑕᓇᙱᑦᑐᒃᑯᑦ, ᑐᙵᕕᐅᒍᓐᓇᖅᑐᒃᑯᑦ ᑕᐃᒪᙵᓕᒫᕐᓗ ᑐᙵᓇᕐᓂᒃᑯᑦ ᐃᑲᔪᕈᒪᐃᓐᓇᕐᓂᒃᑯᓪᓗ ᐱᔨᑦᓯᖅᑕᒥᓐᓂ. ᐊᐅᓚᓂᖃᖅᐸᑦᑐᖅ 26ᓄᑦ ᐅᐸᒐᑦᓴᐅᔪᓄᑦ ᓄᓇᑦᓯᐊᕐᒥ, ᓄᓇᕕᒻᒥ ᐊᒻᒪᓗ ᓄᓇᕗᒻᒥ, ᖃᓪᓗᓈᑦ ᓄᓇᖏᓐᓂ ᑐᑦᑕᕐᕕᖃᖅᑐᑎᑦ ᐋᑐᕚᒥ, ᒪᓐᑐᕌᒥ ᐊᒻᒪᓗ ᐊᑦᒪᑕᓐᒥ, ᐊᔾᔨᒌᙱᑦᑐᓂᒃ ᖃᖓᑕᓲᖁᑎᖃᖅᑐᑎᑦ ᕘᐃᖕ (Boeing 737) ᐊᒻᒪᓗ ATR 42 ᖃᖓᑕᓲᕐᓂᒃ. ᑲᓇᐃᑎᐊᓐ ᓄᐊᑦ (Canadian North) ᑦᓵᑕᕐᓂᒃᑯᑦ ᐱᔨᑦᓯᕋᖅᐸᑦᑐᑦ ᐊᖏᔫᑎᓄᑦ ᐱᓕᕆᕕᐅᔪᓄᑦ ᐱᔨᑦᓯᖅᑕᐅᒋᐊᓕᓐᓄᑦ ᑐᙵᕕᖃᕐᓂᒃᑯᑦ, ᐱᐊᓚᐃᑦᑐᒃᑯᑦ ᐊᑭᑐᓗᐊᙱᑦᑐᓂᓪᓗ ᑎᑭᑦᑕᕐᕕᖃᖅᑐᑦ/ᐊᐅᓪᓚᖅᑕᕐᕕᖃᖅᑐᑦ ᐊᐅᓚᑦᓯᕙᑦᑐᓂᓪᓗ ᖃᖓᑕᓲᕐᓂᒃ ᐅᐊᓐᓇᖓᓐᓂ ᒥᐊᓕᒐᐅᑉ ᓄᓇᓕᕐᔪᐊᖓᑦᑕ ᐅᖓᑖᓄᓪᓗ ᐱᙳᐊᖅᑎᐅᔪᓄᑦ, ᐅᒥᐊᕐᔪᐊᓄᑦ ᐳᓚᕋᖅᑎᓄᑦ, ᐳᓚᕋᖅᑐᓕᕆᔨᓄᑦ ᐊᓯᖏᓐᓄᓪᓗ ᐊᒥᓲᓂᖃᖅᑐᓄᑦ ᑲᑎᙵᔪᓄᑦ. ᑲᓇᐃᑎᐊᓐ ᓄᐊᑦ (Canadian North)
ᐊᑕᖏᖅᑐᒍ−ᓇᒻᒥᓂᕆᔭᐅᔪᖅ ᒪᑭᕕᒃ ᑯᐊᐸᕇᓴᒃᑯᓐᓄᑦ (Makivik Corporation) ᐊᒻᒪᓗ ᐃᓄᕕᐊᓗᐃᑦ ᐊᕕᑦᑐᖅᓯᒪᔪᖏᓐᓂ ᑯᐊᐸᕇᓴᖏᓐᓄᑦ (Inuvialuit Development Corporation).

ᑐᑭᓯᒋᐊᒃᑲᓐᓂᕈᒪᒍᕕᑦ ᑐᓴᕆᐊᕐᕕᒋᓗᒍ:
ᐋᓂ ᑖᒻᓕᓐᓴᓐ (Annie Thomlinson) ᐊᐅᓚᑦᓯᔨ, ᑐᓴᖅᑐᓕᕆᐅᑎᓄᑦ ᑲᓇᐃᑎᐊᓐ ᓄᐊᑦ (Canadian North) ᑐᓴᕆᐊᕐᕕᑦᓴᖅ: ᐅᖄᓚᐅᑎᕋᓛᒃᑯᑦ 613-614-7364 | athomlinson@canadiannorth.com ᐃᑭᐊᖅᑭᕖᒃ: charters.canadiannorth.com | www.canadiannorth.com
ᑲᓇᐃᑎᐊᓐ

Share this News:

Share on facebook
Share on google
Share on twitter
Share on linkedin