ᐅᑉᐱᕆᔭᖃᕋᑦᑕ ᓴᙱᓂᕆᔭᖓᓂ ᓴᓇᙳᐊᕐᓂᒃᑯᑦ ᒪᓕᒐᒪᓂᕐᒥᑦ, ᑲᓲᒪᑎᑦᑎᓂᕐᒥᑦ, ᐊᒻᒪᓗ ᐱᐅᔪᒥᑦ ᐊᑦᑐᐊᓂᕐᒧᑦ. ᑲᑐᔾᔨᖃᑎᖃᕐᓗᑕ ᐃᓄᓐᓂᒃ ᓴᓇᙳᐊᖅᑎᓂᒃ, ᐊᑑᑎᖃᓪᓚᕆᑦᑐᒃᑯᑦ ᑲᓲᒪᖃᑎᖃᓲᖑᔪᒍᑦ ᐃᓚᒋᔭᑦᑎᓐᓂᒃ ᐊᒻᒪᓗ ᑕᑯᔅᓴᐅᑎᑦᑎᓪᓗᑕ ᐃᓄᓐᓂᒃ ᓴᓇᙳᐊᖅᑐᓂᒃ ᐃᓄᐃᑦ ᓄᓇᖓᓂ ᐊᒻᒪᓗ ᓂᒋᐊᓂᕐᒥᐅᑕᓂᑦ ᐃᓄᓐᓂᒃ ᑲᓇᑕᒥ. ᖁᕕᐊᒋᔭᖃᓪᓚᕆᑦᑐᒍᑦ ᓴᖅᑮᓂᕐᒥᑦ ᑕᕝᕙᓂ ᐊᕐᕌᒎᔪᒥᑦ Aurora Rewards Diamond (ᐊᕈᐊᕋ ᑐᓂᕐᕈᓯᐊᑦ ᑕᐃᒪᓐ) ᐃᓚᒋᔭᐅᔪᓄᑦ ᓇᓗᓇᐃᒃᑯᑕᕐᒥᑦ ᖁᔭᓕᓯᒪᓂᑦᑎᓐᓂᒃ: ᕿᔪᒻᒧᑦ ᐊᒥᐊᖅᓯᒪᔪᖅ ᐃᓄᒻᒧᑦ ᑎᑎᖅᑐᒐᖅᑎᒧᑦ ᒐᐃᔪᓪ ᐅᔭᒐᕿ ᖃᑉᓗᓈ.
ᖃᐅᔨᒪᔭᐅᔪᖅ ᑎᑎᖅᑐᒐᖃᑦᑕᕐᓂᖓᓄᑦ, ᒪᕋᕐᒨᖅᓯᒪᔪᓄᑦ, ᐊᒻᒪᓗ ᓄᕕᖅᓵᖅᓴᒨᖓᔪᓄᑦ, ᒐᐃᔪᓪ ᖁᕕᐊᒋᔭᐅᓪᓚᕆᑦᑐᖅ ᓴᓇᙳᐊᖅᑎᓪᓗᓂ ᓴᓇᖃᑦᑕᖅᑕᖏᑦ ᐃᓕᓴᕆᔭᐅᕙᓪᓕᐊᓪᓗᑎᒃ ᑲᓇᑕᓕᒫᒥᑦ. ᓴᓇᔨᐅᓂᖓ ᖃᓄᐃᑦᑑᓂᖓ ᑕᐃᑲᙶᖅᑐᖅ ᐅᐊᑦᑎᐊᕈᒃ ᐊᔪᙱᑦᑐᓂᑦ ᓴᓇᙳᐊᖅᑎᓂᑦ ᐊᒻᒪᓗ ᒥᖅᓱᖅᑎᓂᑦ ᐃᓚᒋᔭᖏᓐᓂᒃ, ᐊᓈᓇᑦᑎᐊᕆᔪᔭᖓ ᕕᒃᑐᐊᕆᔭ ᒪᐊᒻᖑᖅᓱᐊᓗᒃ, ᐊᒻᒪᓗ ᐊᒪᐅᕆᔪᔭᖓ, ᔨᐊᓯ ᐅᓈᖅ. ᑐᙵᓱᒋᑦ ᑕᑯᔅᓴᐅᑎᑦᑎᔪᖅ ᓄᓇᓕᒻᒥ ᐊᒻᒪᓗ ᑐᙵᓇᕐᓂᖏᑦ ᐃᓄᐃᑦ ᐃᓕᖅᑯᓯᖓ, ᐊᒻᒪᓗ ᖁᕕᐊᓲᑎᖃᖅᑐᖅ ᐃᑉᐱᒋᔭᐅᔪᒥᑦ ᑲᑎᖃᑎᒌᓐᓂᕐᒥᑦ. ᐃᓱᒪᒋᓪᓗᓂᐅᒃ ᐱᕙᓪᓕᐊᓂᖓ, ᒐᐃᔪᓪ ᐅᖃᖅᑐᖅ “ᖁᕕᐊᒋᓪᓚᕆᔪᔭᕋ ᓴᓇᕙᓪᓕᐊᓪᓗᒍ, ᑕᐃᒫᖑᕙᓪᓚᐃᔪᖅ ᐃᒻᒥᓂ ᓴᖅᑭᓯᒪᔪᖅ ᓴᓇᓯᒪᔭᓐᓂ. ᐃᓱᒪᒋᔭᒃᑯᑦ ᐱᐅᓛᖑᓯᒪᔪᑦ ᐅᖃᐅᓯᕆᔭᐅᓯᒪᔪᑦ ᐃᓄᐃᑦ ᑕᐃᒫᒃ ᐱᓕᕆᒍᓐᓇᕐᓂᖏᓐᓂᒃ. ᑕᑯᒐᔭᕐᒪᑕ ᓴᓇᓯᒪᔪᒥᑦ ᐊᒻᒪᓗ ᐃᑉᐱᓐᓂᐊᖃᑕᐅᓕᕐᓗᑎᒃ ᐅᕙᖓ ᐃᑉᐱᓐᓂᐊᕆᔪᔭᖓᓂ ᓴᓇᕙᓪᓕᐊᑎᓪᓗᖓ. ᐅᕙᒎᒐᑦᑕ, ᑲᑎᖃᑎᒌᑦᑐᑕ. ᐱᕐᔪᐊᕌᓘᖏᑦᑐᖅ, ᐊᓯᔾᔩᖏᑦᑐᖅ. ᑭᓯᐊᓂ ᐃᑉᐱᒍᓱᑦᑎᐊᓕᕐᓇᖅᑐᖅ ᐅᕙᒍᑐᐃᓐᓇᐅᓗᑕ.”
ᒐᐃᔪᓪ ᑐᙵᓴᐃᔪᒻᒪᑦ ᑲᓇᐃᑎᐊᓐ ᓄᐊᑦ ᓴᓇᙳᐊᕐᕕᖓᓄᑦ, ᑕᑯᒋᐊᕈᓐᓇᖅᑎᑦᑎᓪᓗᓂ ᐃᓱᒪᑐᓂᖓᓂ ᐱᕙᓪᓕᐊᓂᕆᔭᖓᓂ ᖃᓄᕐᓗ ᓴᓇᓐᓂᕐᒪᖔᖅ ᑖᔅᓱᒥᖓ ᑐᙵᓱᒋᑦ. ᐅᓂᒃᑳᖅ ᑕᐅᑐᒍᒃ:
“ᓄᓇᓕᓕᒫᑦ ᓴᓇᔭᐅᓲᖑᒻᒪᑕ ᐃᓄᖁᑎᖏᓐᓄᑦ ᐊᒻᒪᓗ ᖁᕕᐊᓇᓚᐅᖅᑐᖅ ᖃᐅᔨᑎᑕᐅᒍᓐᓇᓚᐅᕋᒪ ᐃᓄᐃᑦ ᑐᙵᓇᕐᓂᖏᓐᓂᒃ. ᖁᕕᐊᒋᔭᖃᓪᓚᕆᑦᑐᖓ ᑕᑯᔅᓴᐅᑎᑦᑎᓂᕐᒥᑦ ᖁᕕᐊᒋᔭᐅᓂᖓ ᐃᓅᒋᐊᖓ ᐅᕙᖓ ᓴᓇᔭᖏᓐᓂ. ᑖᓐᓇ ᓴᓇᓯᒪᔪᖅ ᑕᑯᔅᓴᐅᑎᑦᑎᔪᖅ ᐊᔾᔨᒌᙱᑦᑐᓂᑦ ᐃᓄᓐᓂᒃ ᑲᑎᖃᑎᒌᑦᑐᓂᒃ ᓂᕆᖃᑎᒌᓂᕐᒥᑦ ᐃᖃᓗᒥᓂᕐᒥᑦ, ᐊᒡᒍᖅᓯᒪᔪᓂᑦ ᐃᖃᓗᒥᓂᕐᓂᒃ. ᓇᓗᓇᐅᒃᑯᑕᐅᔪᖅ ᓄᓇᓕᐅᖃᑎᒌᓂᑦᑎᓐᓂᒃ, ᑐᓂᓯᖃᑦᑕᐅᑎᓂᕐᒥᑦ ᐊᒻᒪᓗ ᖁᕕᐊᒋᔭᐅᓂᖓ ᑲᑎᖃᑎᒌᓐᓂᐅᔪᖅ.”
ᒐᐃᔫᑉ ᓴᓇᓯᒪᔭᖓ ᓴᖅᑮᑐᐃᓐᓇᖏᑦᑐᖅ ᓴᓇᙳᐊᖅᑎᐅᓂᖓᓂ ᐊᔪᙱᑕᒥᓂ ᑭᓯᐊᓂ ᐃᖅᑲᐃᑎᑦᑎᒋᐊᕈᑕᐅᔪᖅ ᓴᙱᓂᕆᔭᖓᓂ ᓴᓇᙳᐊᕐᓂᖅ ᑲᓲᒪᑎᑦᑎᓂᕐᒥᑦ, ᓴᖅᑮᓂᕐᒥᑦ ᐃᑉᐱᒋᔭᐅᔪᓂᑦ, ᐊᒻᒪᓗ ᖁᕕᐊᓲᑎᖃᕐᓂᕐᒥᑦ ᑭᓇᐅᒋᐊᔅᓴᑎᓐᓂᒃ. ᖁᕕᐊᓱᓪᓚᕆᑦᑐᒍᑦ ᓂᐅᕕᖅᓯᒪᒐᑦᑕ ᑖᔅᓱᒥᖓ ᓴᓇᙳᐊᖅᓯᒪᔪᒥᑦ ᐊᒻᒪᓗ ᓂᕆᐅᒋᔭᖃᖅᑐᒍᑦ ᑕᑯᒃᑲᓐᓂᓂᕐᒥᑦ ᒐᐃᔫᑉ ᓴᓇᓯᒪᔭᖏᓐᓂᒃ ᓯᕗᓂᔅᓴᒥᑦ.
ᖃᐅᔨᒋᐊᒃᑲᓐᓂᓂᕐᒧᑦ ᒐᐃᔪᓪ ᐅᔭᒐᕿ ᖃᑉᓗᓈᑉ ᓴᓇᓯᒪᔭᖏᓐᓂᒃ, ᐃᑭᐊᖅᑭᕕᖓ
ᑕᑯᒋᐊᕐᓗᒍ, ᐅᕝᕙᓘᓐᓃᑦ 
Instagram (ᐊᔾᔨᙳᐊᖃᕐᕕᒃ)
