ᓄᕖᕝᕙ 21, 2025−ᖑᑎᓪᓗᒍ, ᑲᓇᐃᑎᐊᓐ ᓄᐊᑦ−ᒃᑯᑦ ᐅᐱᒍᓱᓚᐅᖅᑐᑦ ᐃᓕᓴᕆᔭᐅᓯᒪᓪᓗᑎᑦ ᖃᖓᑕᔫᖅᑎᒋᔭᐅᓚᐅᕐᒪᑕ ᐃᐅᓪᐱᔅ ᐅᑭᐅᖅᑕᖅᑐᒥ ᓴᐳᒻᒥᐅᓯᖅᓯᓂᕐᒧᑦ ᓂᕐᔪᑎᓂᒃ ᐊᕙᑎᒥᓪᓗ ᑮᓇᐅᔭᓕᐅᕋᓱᐊᕈᑎᒋᔭᐅᓇᓱᒃᑐᑎᑦ ᓂᕆᔪᖃᖅᑎᓪᓗᒍ ᑐᕌᓐᑐᒥ.
ᑖᓐᓇ ᐊᕐᕌᒍᑕᒫᑦ ᑮᓇᐅᔭᓂᒃ ᓄᐊᑦᑎᒐᓱᐊᕐᓇᐅᕗᖅ ᓂᕆᔪᖃᖅᑎᓪᓗᒍ ᑲᑎᑎᑦᑎᓂᖃᓲᖅ ᓇᒻᒥᓂᖁᑎᓕᓐᓂᒃ ᐊᒻᒪᓗ ᑮᓇᐅᔭᓂᒃ ᐊᐃᑦᑑᓯᐊᖅᑎᑦᑎᓲᑦ ᓯᕗᓕᖅᑎᖏᓐᓂᒃ, ᑮᓇᐅᔭᓂᒃ ᐊᐃᑦᑐᐃᓲᕐᓂᒃ, ᐊᒻᒪᓗ ᐸᐸᑦᑎᔨᐅᔪᑦ ᐱᓕᕆᖃᑎᒋᔭᐅᓲᕐᓂᒃ ᐃᑲᔪᖅᑐᖅᑕᐅᖁᓪᓗᒍ ᐅᑭᐅᖅᑕᖅᑐᒥ ᐸᐸᑦᑎᓇᓱᐊᕈᑏᑦ ᐊᒻᒪᓗ ᐃᓄᖕᓄᑦ−ᓯᕗᒃᑲᖅᑖᖑᔪᑦ ᐱᓕᕆᐊᕐᓂᒃ. ᑕᒫᓂ ᐊᕐᕌᒍᒥ ᓂᕆᔪᖃᖅᑎᓪᓗᒍ ᖃᐃᔪᖃᓚᐅᖅᑐᖅ 212−ᓂᒃ ᖃᐃᖁᔭᐅᓯᒪᔪᓂᒃ ᐊᒻᒪᓗ ᑮᓇᐅᔭᓂᒃ ᓄᐊᑦᑎᓪᓗᑎᑦ ᐅᖓᑖᓃᑦᑐᓂᑦ $300,000, ᓇᓗᓇᐃᒃᑯᑕᐅᓪᓗᓂ ᑕᒪᓐᓇ ᐊᒥᓱᕈᖅᐸᓪᓕᐊᑐᐃᓐᓇᓕᕐᓂᖏᓐᓂᒃ ᑲᒪᒋᔭᖃᕋᓱᐊᖅᑐᑦ ᓴᐳᒻᒥᐅᓯᖅᓯᓗᑎᑦ ᐅᑭᐅᖅᑕᖅᑐᒥ.
ᑮᓇᐅᔭᑦ ᐅᓐᓄᒃᑯᑦ ᓄᐊᑕᐅᔪᑦ ᐃᑲᔪᖅᑐᐃᓂᓖᑦ ᓄᓇᕐᔪᐊᕐᒥ ᓂᕐᔪᑏᑦ ᐸᐸᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂᒃ−ᑲᓇᑕᑉ ᐃᖅᑲᓇᐃᔮᖓ ᐅᑭᐅᖅᑕᖅᑐᒧᑦ ᑖᒃᑯᑎᒎᓇᖅ ᑲᕆᓐ ᕙᓛᑐ ᐅᑭᐅᖅᑕᖅᑐᒧᑦ ᑮᓇᐅᔭᖃᖅᑎᑕᐅᓲᑦ, ᐃᑲᔪᖅᑐᑦ ᓯᕗᒧᐊᑦᑎᑕᐅᓪᓗᓂ ᐋᖅᑭᒃᑕᐅᖁᓪᓗᒍ ᐊᕐᕕᖅᑑᖅ ᐃᓄᐃᑦ ᓴᐳᔾᔭᐅᓯᒪᔪᑦ ᐸᐸᑕᐅᕝᕕᐅᔪᓪᓗ ᑕᓗᕐᔪᐊᕐᒥ. ᑖᓐᓇ
ᐱᓕᕆᐊᖅ ᐊᔾᔨᖃᖅᑐᖅ ᐊᖏᓂᖅᓴᒥᒃ ᑕᐅᑐᙳᐊᒐᕆᔭᐅᔪᓂᒃ ᐊᑐᖅᑕᐅᖁᔭᐅᓛᖅᑐᓂᒃ ᐊᕕᑦᑐᖅᓯᒪᔪᒧᑦ, ᑲᓱᖅᓯᒪᓂᖃᕐᓗᑎᑦ ᓄᓇᒧᑦ ᐊᒻᒪᓗ ᐃᒪᕐᒧᑦ ᐸᐸᑕᐅᓂᖏᑦ ᐊᔾᔨᖃᕐᓗᑎᑦ ᓄᓇᓕᓐᓂ ᓯᕗᓪᓕᐅᔾᔭᐅᖁᔭᐅᔪᑦ ᓲᕐᓗᒃ ᐱᔪᓐᓇᕈᒪᔪᑦ ᓂᕿᑦᑎᐊᕙᓂᒃ, ᒪᑭᒪᔪᓐᓇᖅᑐᒥᒃ ᐱᕙᓪᓕᐊᔪᓕᕆᓂᖅᑕᖃᕐᓗᓂ ᑮᓇᐅᔭᓕᐅᕋᓱᐊᕈᑎᓂᑦ, ᐊᑑᑎᖃᑦᑎᐊᖅᑐᒥᒃ ᐃᖅᑲᓇᐃᔮᒃᓴᖅᑕᖃᕐᓗᓂ, ᐊᒻᒪᓗ ᓴᐳᒻᒥᐅᓯᖅᑕᐅᓗᑎᑦ ᐃᓄᐃᑦ ᖃᐅᔨᒪᓂᖏᑦ, ᐃᓕᖅᑯᓯᖏᑦ, ᐊᒻᒪᓗ ᐅᖃᐅᓯᖏᑦ.
ᑮᓇᐅᔭᖃᕐᕕᒃ ᓴᙵᑦᑎᕆᒻᒥᔪᖅ ᐊᕕᑦᑐᖅᓯᒪᔪᒥ ᐱᓕᕆᐊᖃᕈᑎᒋᔭᐅᕙᓪᓕᐊᓂᖓ ᑲᔪᓯᓗᒍ ᐃᑲᔪᖅᑐᐃᓂᑦᑎᓐᓄᑦ ᐃᓚᐅᖃᑕᐅᑎᑕᐅᓪᓗᑎᑦ ᓄᓇᓕᖏᑦ ᖃᓂᑦᑐᓃᑦᑐᑦ, ᓲᕐᓗᒃ ᑯᒑᕐᔪᒃ ᐊᒻᒪᓗ ᐅᖅᓱᖅᑑᖅ, ᓇᒻᒥᓂᖅ ᓄᓇᓕᖏᓐᓄᑦ ᓯᕗᒃᑲᖅᑖᖑᔪᑦ ᓴᐳᒻᒥᐅᓯᖅᓯᓂᕐᒧᑦ ᐱᓕᕆᐊᕐᓂᒃ, ᑲᒪᒍᒪᓕᖅᓯᒪᓪᓗᑎᑦ ᓯᕗᓕᖅᑎᐅᓂᖏᑦ ᑕᑯᑦᓴᐅᑎᑦᑎᔪᑦ ᐊᕐᕕᖅᑑᕐᒥ, ᑖᒃᑯᐊ ᓄᓇᓕᐅᔪᑦ ᐃᖅᑲᓇᐃᔭᖃᑎᓖᑦ ᓄᓇᕐᔪᐊᕐᒥ ᓂᕐᔪᑏᑦ ᐸᐸᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂᒃ−ᑲᓇᑕᒥ ᓯᕗᒧᐊᑦᑎᑕᐅᖁᓪᓗᒋᑦ ᐅᐸᓗᖓᐃᔭᑦᑎᐊᖅᓯᒪᔪᑦ, ᐃᓄᖕᓄᑦ ᑲᒪᒋᔭᐅᔪᑦ ᐱᓕᕆᐊᕆᐊᙵᐅᑎᖏᑦ ᐸᐸᑦᑎᓂᕐᒧᑦ ᐅᑭᐅᖅᑕᖅᑐᒥ.
ᑮᓇᐅᔭᑦ ᓄᐊᑕᐅᔪᑦ ᐃᑲᔪᕐᒥᔪᑦ ᐊᑦᑐᐃᓂᖃᐃᓐᓇᕐᓂᖏᑦ ᐃᐅᓪᐱᔅ ᑎᒥᖓᑕ ᓯᕗᓪᓕᖅᐹᒥᒃ ᑐᓂᔭᒥᓂᖏᑦ ᓄᓇᕐᔪᐊᕐᒥ ᓂᕐᔪᑏᑦ ᐸᐸᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂᒃ−ᑲᓇᑕ ᓴᐳᔾᔭᐅᖁᓪᓗᒍ ᑭᖑᓪᓕᖅᐹᒥᒃ ᓯᑯᖃᕐᕕᒃ, ᐊᕕᑦᑐᖅᓯᒪᔪᖅ ᐱᕐᔪᐊᕌᓘᔪᖅ ᐊᐅᔭᒃᑯᑦ ᓯᑯᖓ ᐊᑯᓂᐅᓛᖑᓲᖅ ᐅᖅᑰᓇᖅᓯᕙᓪᓕᐊᓕᕋᓗᐊᖅᑎᓪᓗᒍ ᓯᓚ. ᑕᒫᓂᓕ, ᐱᖃᓯᐅᔾᔨᔪᑦ ᐱᑭᐊᓚᓱᖅᓱᐊᖅ ᐅᑭᐅᖅᑕᖅᑐᒥ ᓴᕐᕙᖓ, ᓂᕆᐅᒋᔭᐅᔪᖅ ᐱᒻᒪᕆᐅᔪᒥᒃ ᓯᕗᓂᒥ ᓇᓄᕐᓄᑦ ᓇᔪᒐᐅᓛᕐᓂᐊᕋᓱᒋᔭᐅᓪᓗᓂ.
ᑲᓇᐃᑎᐊᓐ ᓄᐊᑦ−ᒃᑯᑦ ᐱᓕᕆᖃᑕᐅᓂᖏᑦ ᓂᕆᕕᔾᔪᐊᖅᑐᖃᖅᑎᓪᓗᒍ, ᖁᕕᐊᓚᐅᖅᑐᒍᑦ ᐃᑲᔪᕆᐊᒃᓴᖅ ᒪᕐᕉᓐᓂᒃ ᐅᑎᐅᑎᒌᓐᓂᒃ ᖃᖓᑦᑕᐅᑏᓐᓂᒃ ᐋᑐᕚᒥ ᓇᓕᐊᓐᓄᑐᐃᓐᓇᖅ ᓄᓇᕗᑦ ᓄᓇᓕᖓᓄᑦ ᑐᓂᓯᓪᓗᑕ, ᑲᔪᖏᖅᓴᕈᑎᒋᓪᓗᒍ ᐊᑑᑎᖃᑦᑎᐊᖅᑐᒥᒃ, ᒪᑭᒪᔪᒃᑯᑦ ᐊᐅᓪᓚᖃᑦᑕᖁᔨᓪᓗᑕ ᐅᑭᐅᖅᑕᖅᑐᒧᑦ ᐊᒻᒪᓗ ᐃᑲᔪᖅᑐᑕ ᐊᒥᓱᒃᑲᓐᓂᕐᓄᑦ ᐃᓄᖕᓄᑦ ᐱᐅᒃᓴᕐᓗᑎᑦ ᐊᒻᒪᓗ ᒪᑭᒪᑦᑎᐊᖅᑐᑯᓘᓂᖓᓂᒃ ᐅᑭᐅᖅᑕᖅᑐᖅ ᖃᐅᔨᔭᐅᖁᓪᓗᒍ.
ᐅᐱᒍᓱᑉᐳᒍᑦ ᓇᖏᖃᑎᒋᔪᓐᓇᕋᑦᑎᒍᑦ ᓄᓇᓕᐅᔪᑦ ᐊᒻᒪᓗ ᐱᓕᕆᖃᑎᒌᑦᑐᑦ ᑲᑐᔾᔨᔪᑦ ᑲᒪᒋᔭᖃᐃᓐᓇᕐᓂᐊᕐᓂᑦᑎᓐᓂᒃ ᓴᐳᒻᒥᐅᓯᕐᓗᒍ ᐅᑭᐅᖅᑕᖅᑐᖅ ᑭᖑᕚᑦᓴᐅᓂᐊᖅᑐᓄᑦ ᐃᓄᖕᓄᑦ−ᓯᕗᒃᑲᖅᑖᖑᔪᓂᒃ ᐸᐸᑦᑎᖃᑦᑕᖅᑐᑦ ᐊᒻᒪᓗ ᒪᑭᒪᑎᑦᑎᓐᓇᓱᐊᖃᑦᑕᓲᑦ.
“ᐃᐅᓪᐱᔅ ᑎᒥᖓ ᖁᔭᓕᕗᑦ ᑲᓇᐃᑎᐊᓐ ᓄᐊᑦ−ᒃᑯᑦ ᐃᑲᔪᖅᑐᐃᓂᖏᓐᓂᒃ ᐃᐅᓪᐱᔅ ᐅᑭᐅᖅᑕᖅᑐᒥ ᓂᕆᕕᔾᔪᐊᕈᑕᐅᑎᓪᓗᒍ ᐊᒻᒪᓗ ᐃᑲᔪᖅᑐᐃᓪᓗᑎᑦ ᑲᕆᓐ ᕙᓛᑐ ᐅᑭᐅᖅᑕᖅᑐᒧᑦ ᑮᓇᐅᔭᖃᕐᕕᖓᓂ ᑕᐃᑲᓂ ᓄᓇᕐᔪᐊᕐᒥ ᓂᕐᔪᑏᑦ ᐸᐸᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂᒃ−ᑲᓇᑕᑉ ᐃᖅᑲᓇᐃᔮᖓ ᐅᑭᐅᖅᑕᖅᑐᒧᑦ. ᐱᓕᕆᖃᑎᒋᔭᐅᓪᓗᑎᑦ ᐃᑲᔪᖅᑐᐃᓂᓖᑦ ᐃᓄᖕᓄᑦ−ᓯᕗᒃᑲᖅᑖᖑᔪᒥᒃ ᐸᐸᑕᐅᓂᖓᓂᒃ ᑕᓗᕐᔪᐊᕐᒥ ᐊᒻᒪᓗ ᐅᖓᑖᓄᑦ, ᓴᐳᒻᒥᐅᓯᖅᓯᓪᓗᑎᑦ ᓂᕐᔪᑎᓂᒃ, ᓇᔪᒐᖏᓐᓂᒃ, ᐊᒻᒪᓗ ᓄᓇᖓᓂᒃ ᐋᖅᑮᔪᑦ ᑲᕆᓐ ᑲᓱᖅᓯᒪᓂᐊᓗᐊᓂᒃ ᑲᓇᑕᑉ ᐅᑭᐅᖅᑕᖅᑐᒧᑦ.”
— ᕈᑎ ᕙᓛᑐ, ᐋᖅᑮᔪᒥᓂᖅ ᐃᐅᓪᐱᔅ ᑎᒥᖓᓂᒃ.