ᐊᓱᐃᓪᓛᒃ ᓴᖅᑭᖅᐳᖅ – ᑲᓇᐃᑎᐊᓐ ᓄᐊᑦ ᓄᑖᖑᓪᓗᓂ ᖃᖓᑕᓲᓕᕆᔨᐅᓪᓗᓂ ᐃᑲᔪᖅᑐᐃᓕᕐᑐᖅ ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ (VWB) ᐊᒻᒪ ᐅᑭᐅᖅᑕᖅᑐᒥ ᐆᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᑦ (NAHI). ᑕᒪᓐᓇ ᑐᑭᖃᕐᑐᖅ ᐃᑲᔪᖅᑐᐃᒐᑦᑕ ᑕᒪᒃᑮᓐᓂᒃ ᐆᒪᔪᖁᑎᒋᔭᐅᔪᓂᒃ ᐊᒻᒪ ᓄᓇᓕᓐᓂ ᐃᓄᖏᑦ ᖃᓄᐃᖏᑦᑎᐊᖁᓪᓗᒋᑦ.
ᐅᑭᐅᖅᑕᖅᑐᒥ ᐆᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᑦ ᐆᒪᔪᓄᑦ ᓘᑦᑖᑦ ᐱᓕᕆᖃᑎᒌᑦᑐᑦ ᐅᖓᓯᑦᑐᒥ ᓄᓇᓕᓐᓂ ᓄᓇᕗᒻᒥ ᐊᒻᒪ ᓄᓇᑦᓯᐊᕐᒥ. ᐱᓕᕆᖃᑎᒌᑦᑐᑦ ᐱᓕᕆᖃᑎᖃᕐᐸᑦᑐᑦ ᓄᓇᓕᓐᓂ ᓇᓗᓇᐃᔭᐃᓪᓗᑎ ᐱᔭᐅᔭᕆᐊᓕᓐᓂᑦ ᐊᒻᒪ ᓴᓇᓪᓗᑎ ᐊᑯᓂᐅᔪᒧᑦ, ᓄᓇᓕᓐᓂ−ᐊᐅᓚᑕᐅᓗᑎ ᐆᒪᔪᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᕕᓐᓂᒃ. ᑕᒫᓂ ᐊᕐᕌᒍᒋᓚᐅᖅᑕᑎᓐᓂ, ᐱᓕᕆᖃᑎᒌᑦᑐᖅ ᓄᓇᓕᓐᓅᓚᐅᕐᑐᑦ 11−ᓄᑦ, ᐱᓕᕆᐊᖃᖅᑐᑎ 1,233−ᓂ ᐆᒪᔪᓂᒃ.
“ᐅᓇ ᑮᓇᐅᔭᖃᖅᑎᑦᑎᓂᖅ ᑐᑭᖃᕐᑐᖅ ᐆᒪᔪᓕᕆᓂᕐᒧᑦ ᓘᑦᑖᑦ ᐃᑲᔪᖅᑐᐃᒍᓐᓇᓂᐊᕐᑐᑦ ᐊᒥᓱᒃᑲᓂᕐᓂᒃ ᐆᒪᔪᓂᒃ ᐊᒻᒪ ᐆᒪᔪᖁᑎᖃᖅᑐᓂᒃ ᓄᓇᓕᓐᓂ ᐅᖓᓯᑦᑑᓂᕐᓴᓂᒃ, ᑭᓯᐊᓂᓕ, ᐊᑐᐃᓐᓇᖃᕋᔭᖅᑎᓐᓇᒋᑦ ᐆᒪᔪᓕᕆᔨᓂᒃ,” ᐅᖃᖅᑐᖅ ᓘᑦᑖᖅ ᓯᑲᑦ ᔮᕆ, ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ−ᒃᑯᑦ ᐆᒪᔪᓄᑦ ᓘᑦᑕᕐᓄᑦ ᑐᑭᒧᐊᖅᑎᑦᑎᔨ.
ᓴᙵᑎᑦᑎᒐᓱᐊᕐᑐᒋᑦ ᐆᒪᔪᐃᑦ ᐅᑭᐅᖅᑕᖅᑑᑉ ᓄᓇᓕᖏᓐᓂ ᓴᙵᑎᑦᑎᒍᓐᓇᕐᒥᔪᖅ ᖃᓄᐃᖏᑦᑎᐊᕐᓂᖏᑕ ᓄᓇᓃᑦ ᐃᓄᖁᑎᖏᓐᓂ, ᔮᕆ ᐅᖃᒃᑲᓐᓂᖅᑐᓂ. ᐊᑦᑕᓇᖅᑐᒦᑎᑦᑎᖏᓂᕐᓴᐅᓂᐊᕐᑐᖅ ᑕᒪᒃᑮᓐᓂᒃ ᓄᓇᓖᑦ ᐃᓄᖁᑎᖏᓐᓂ ᐊᒻᒪ ᐆᒪᔪᖁᑎᖏᓐᓂ ᐋᓐᓂᐊᑖᖑᔪᓐᓇᖅᑐᓂᒃ ᓯᖏᖅᓯᓂᖅ ᐆᒪᔪᓄᑦ ᑐᓂᔭᐅᒍᓐᓇᕐᒪᑦ ᐃᓄᓐᓄᑦ.
“ᐊᑦᓱᐊᓗᒃ ᐅᐱᒍᓱᑉᐳᖓ ᐱᓕᕆᖃᑎᖃᕆᐊᒃᓴ ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ,” ᐅᖃᖅᑐᖅ ᑯᕆᐊᒡ ᕚᑯ, ᑲᓇᐃᑎᐊᓐ ᓄᐊᒃᑯᑦ ᑐᑭᒧᐊᖅᑎᑦᑎᔨᖓ, ᐱᔨᖅᑎᕋᖅᑕᐅᔪᓄᑦ ᐃᑲᔪᖅᓱᐃᓂᖅ ᐊᒻᒪ ᓄᓇᓕᓐᓂ ᑮᓇᐅᔭᓕᐅᕈᑕᐅᓇᓱᒃᑐᓄᑦ. “ᐅᓇ ᐱᓕᕆᖃᑎᒌᓐᓂᖅ ᐅᕙᑦᑎᓐᓂ ᑐᑭᓯᑎᑦᑎᔪᖅ ᐱᔭᕆᐊᖃᖅᑕᐅᔪᓂᒃ ᐊᒻᒪ ᐱᒡᒐᓇᕈᑕᐅᔪᓂᒃ ᑮᓇᐅᔭᖃᖅᑎᑦᑎᓂᕐᒥ ᑕᒪᒃᑮᓐᓄᑦ ᐃᑲᔪᖅᑐᓂᕐᒥ ᑮᓇᐅᔭᑎᒍᑦ ᒫᓐᓇ ᐱᔭᐅᔭᕆᐊᖃᖅᑐᓂᒃ ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ−ᒃᑯᓐᓄᑦ ᐊᒻᒪ ᓯᕗᓂᒃᓴᒥᑦ ᑕᐅᑐᑦᑐᑎᒃ, ᐊᖏᓪᓕᒋᐊᖅᑎᑦᑎᖁᔨᓂᕐᒥᒃ ᐊᒻᒪ ᓄᓇᓕᓐᓄᑦ ᐊᑐᐃᓐᓇᖃᖅᑎᑦᑎᓂᕐᒥᒃ.”
ᐅᖃᕆᐊᖅᑐᓂ, “ᑐᕌᒐᕆᔭᕗᑦ ᐃᓅᓯᖃᑦᑎᐊᖁᔨᓂᐅᕗᖅ ᓄᓇᓕᓐᓂᑦ ᐱᔨᑦᓯᕋᖅᑕᑎᓐᓂᒃ, ᐊᒻᒪ ᐱᓕᕆᖃᑎᖃᕐᓂᕗᓪᓗ ᑐᕌᒐᕗᑦ ᐃᓅᓯᑦᓯᐊᕆᓐᓂᖅᓴᐅᑎᑦᓯᓂᕐᒥᑦ ᓄᓇᓕᓐᓂᑦ ᐱᔨᑦᓯᕋᖅᑕᑎᓐᓂᑦ, ᐱᓕᕆᖃᑎᖃᕐᓂᕗᓪᓗ ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ ᐱᐅᔪᒻᒪᕆᐊᓗᒻᒥ ᐱᕕᖃᖅᑎᑎᒻᒪᑦ ᐃᑲᔪᖅᑐᐃᓂᕐᒥ ᐱᓕᕆᐊᒃᓴᒥ.”
ᑲᓇᐃᑎᐊᓐ ᓄᐊᒃᑯᑦ ᐃᑲᔪᖅᑐᐃᖃᑦᑕᕐᒥᔪᑦ ᐆᒪᔪᓄᑦ ᓘᑦᑖᓂᒃ ᐳᓚᕋᓕᕋᐃᒻᒪᑕ ᑰᔾᔪᐊᕐᒧᑦ ᑐᒃᓯᕋᖅᑕᐅᓕᕋᐃᒻᒪᑕ ᑭᓯᐊᓂ. ᖃᐅᔨᒪᒍᕕᑦ ᐅᕝᕙᓘᓐᓃᑦ ᖃᐅᔨᒪᔭᖃᕈᕕᑦ ᑐᑭᓯᒋᐊᒃᑲᓐᓂᕈᒪᔪᒥᑦ ᓘᒃᑖᓂᒃ ᑭᓪᓕᖃᙱᖦᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ ᒥᑦᓵᓄᑦ ᐅᕝᕙᓘᓐᓃᑦ ᐆᒪᔪᓄᑦ ᓘᑦᑖᑦ ᐳᓚᕋᕐᓂᕆᕙᒃᑕᖏᓐᓂ, ᑐᑭᓯᒋᐊᕐᕕᒋᓗᒍ ᐱᔨᖅᑎᕋᖅᑐᓕᕆᓂᕐᒧᑦ ᐱᓕᕆᐊᖃᕐᑐᑦ.
ᖃᐅᔨᒋᐊᒃᑲᓐᓂᕆᑦ ᐆᒪᔪᓄᑦ ᓘᒃᑖᑦ ᑭᓪᓕᖃᙱᓪᓗᑎᒃ ᐊᒥᐊᓕᒐᐃᑦ ᐅᐊᖕᓇᖓᓂ ᒥᑦᓵᓄᑦ: vwb.org.
Facebook | Instagram | LinkedIn | TikTok
