ᑲᓇᐃᑎᐊᓐ ᓄᐊᑦᑯᑦ ᖃᖓᑕᓲᓕᕆᔩᑦ ᐅᐱᒍᓱᑉᐳᑦ ᐃᑲᔪᒃᑲᓐᓂᕈᓐᓇᓚᐅᕋᒥ ᐃᓄᓕᒫᓄᑦ ᓇᔪᕋᑦᓴᓕᐅᖅᑎᑯᓐᓂᑦ (HFHIQ) ᐊᕐᕌᒍ 18ᒋᔭᖓᓂ ᒑᐱᕐᑏᑦ ᐊᑭᑦᑐᕋᐅᑎᑎᓪᓗᒋᑦ ᐃᑲᔫᑎᑦᓴᓕᐅᕐᑐᑎᑦ ᒑᑎᓄ, ᑯᐱᒃᒥ ᐋᒋᓯ 22ᖑᑎᓪᓗᒍ.
ᒪᕐᕈᐃᑦ ᑕᐱᕇᑦ ᑲᓇᐃᑎᐊᓐ ᓄᐊᑦᑯᑦ ᐱᓐᖑᐊᕐᑎᖏᑦ ᐱᖃᑕᐅᓚᐅᕐᑐᑦ, ᐊᓯᖏᓪᓗ ᐱᓐᖑᐊᕐᑎᐅᖃᑎᖏᑦ ᐃᑲᔪᖅᓱᐃᒋᐊᕐᓯᒪᓚᐅᕐᑐᑦ ᐊᒻᒪ ᑐᓐᓂᕐᓴᐃᓪᓗᑎᑦ ᑕᒧᓗᒐᑦᓴᓂᑦ ᓂᐅᖅᑲᕋᑦᓴᓂᓪᓗ ᒑᐱᕐᑎᓄᑦ.
HFHIQ ᑲᑐᔾᔨᖃᑎᖏᑦ ᐃᑲᔪᕐᑎᖃᕐᓗᑎᑦ ᓄᓇᑦᑎᓐᓂ ᑲᑐᔾᔨᖃᑎᒌᓂᑦ ᐃᓪᓗᓕᐅᕈᓐᓇᕐᓯᖁᓪᓗᒋᑦ ᐃᖃᓗᓐᓂ, ᐊᑭᓕᑦᓴᓂᐅᑎᖏᑦ ᐃᓪᓗᑖᕈᑎᑦᓴᓄᑦ ᕿᑐᕐᖏᐅᕈᑎᖃᓐᖏᓪᓗᑎᑦ ᐊᑭᓕᕐᓱᐃᔪᓐᓇᕐᓂᐊᕐᖓᑕ ᐃᓚᒌᑦ ᐊᑦᑕᓇᖏᑦᑐᓂᑦ ᓴᓇᑦᓯᐊᖅᓯᒪᔪᓂᓪᓗ ᐃᓪᓗᑖᖁᓪᓗᒋᑦ. ᐊᕐᕌᒍᑦᑎᓐᓂ ᐊᑭᑦᑐᕋᐅᑎᑎᓪᓗᒋᑦ ᐱᓐᖑᐊᕐᑐᑦ ᑲᑎᖅᓱᐃᓚᐅᕐᑐᑦ ᐃᓪᓗᓕᐅᕈᑎᑦᓴᓄᑦ ᐃᑲᔫᑎᑦᓴᓂᑦ ᐃᓄᓕᒫᓄᑦ ᓇᔪᕋᑦᓴᓕᐅᖅᑎᒃᑯᑦ 8ᒋᓕᖅᑕᖓᓂᑦ ᐃᓪᓗᓕᐅᖁᓪᓗᒋᑦ ᐃᖃᓗᓐᓂ, ᓂᕆᐅᓇᕐᑐᖅ ᓴᓇᒋᐊᓛᕆᐊᖏᑦ 2027ᒥ 2028ᒥᓘᓐᓃᑦ.
ᑲᓇᐃᑎᐊᓐ ᓄᐊᑦᑯᑦ ᐅᐱᒍᓱᑦᑎᐊᕐᑐᑦ ᐊᑭᓖᔪᓐᓇᖃᑦᑕᕐᖓᑕ ᖃᖓᑦᑕᐅᑎᑦᓴᓂᑦ ᑕᐃᒪᓐᖓᑦ ᐱᓐᖑᐊᕆᐊᓕᓚᐅᕐᓯᒪᒻᒪᑕ ᐊᑭᑦᑐᕋᐅᑎᔪᑦ. ᐊᕐᕌᒍᑦᑎᓐᓂ, ᐊᖏᔪᖅᑳᕗᑦ ᐊᐅᓚᑦᑎᔨᒻᒪᕆᐅᓪᓗᓂᓗ ᓯᐊᓕ ᑎ ᑲᕆᐊ, ᐃᓚᒋᔭᐅᒃᑲᓂᓚᐅᕐᑐᖅ ᐊᑭᑦᑐᕋᐅᑎᑎᓪᓗᒋᑦ, ᑐᓂᓯᔨᐅᓪᓗᓂ ᑐᓐᓂᖅᑯᑎᖏᓐᓂᑦ HFHIQᑯᑦ ᐃᓪᓗᓕᐅᕈᑎᑦᓴᓄᑦ ᐊᒻᒪ ᖃᖓᑦᑕᐅᑎᑦᓴᓂᑦ ᐸᐃᑉᐹᑎᒍᑦ ᓇᓚᐅᑦᓵᑎᑦᓯᓂᒃᑯᑦ ᓵᓚᖃᐅᓯᐊᑦᓴᓂᑦ, ᐊᒻᒪ ᑐᓐᓂᖅᓴᐃᖃᑕᐅᓪᓗᓂ ᑕᒧᓗᒐᑦᓴᓂᑦ ᓂᐅᖅᑲᕋᑦᓴᓂᓪᓗ ᒑᐱᖅᑎᓄᑦ ᓄᓇᓯᐅᑎᕋᓛᖓᓂᖕ.
ᐅᐱᒍᓱᑦᑎᐊᖅᑐᒍᑦ ᐃᑲᔪᖅᑐᐃᔪᓐᓇᖃᑦᑕᕋᑦᑕ ᐱᒋᐊᕐᑎᑕᐅᕙᓪᓕᐊᔪᓂᑦ ᐊᑭᓕᒐᑦᓴᐅᔾᔫᒥᔪᓂᑦ ᐊᒻᒪ ᓴᓇᑦᓯᐊᖅᓯᒪᔪᓂᑦ ᐃᓪᓗᓕᐅᕈᒪᔪᓂᑦ, ᓇᓗᓇᕈᓐᓃᕐᖓᑦ ᖁᕐᕙᖅᐹᓪᓕᕈᑕᐅᕙᒻᒪᑦ ᖃᓄᐃᓐᖏᑦᓯᐊᕐᓂᖕᒧᑦ, ᐃᓕᓐᓂᐊᕐᓂᖕᒧᑦ ᐊᒻᒪ ᐃᓗᓯᒃᑯᑦ ᐊᑲᐅᓯᓴᐅᑎᐅᓪᓗᓂ. ᑕᐃᒪᐃᓕᐅᕐᑐᑦ ᓴᖅᑭᑎᑦᓯᓲᖑᒻᒪᑕ ᑮᓇᐅᔭᕐᑎᒍᑦ ᒪᑭᑉᐸᓪᓕᐊᓂᖕᒥᑦ ᓄᓇᓖᓪᓗ ᐊᓐᓇᐅᒪᑦᓯᐊᕈᓐᓇᕐᓯᓪᓗᑎᑦ, ᒪᓕᑦᓯᐊᕐᑐᑦ ᑐᕌᒐᓕᐊᕆᓯᒪᔭᑦᑎᓐᓂᑦ: ᐱᔨᑦᓯᖃᑦᑕᖅᑕᕗᑦ ᓄᓇᖃᖅᑐᑦ ᐃᓅᓯᖏᓐᓂ ᐊᑲᕐᕆᓂᕐᓴᐅᖁᓪᓗᒋᑦ.
