ᐊᓯᖕᓄᑦ ᑕᑯᔭᐅᔭᕆᐊᖃᙱᑦᑐᑦ ᑐᑭᓯᒋᐊᕈᑏᑦ ᐊᑐᐊᒐᖓ
ᑲᓇᐃᑎᐊᓐ ᓄᐊᑦ−ᒃᑯᑦ ᑲᒻᐸᓂᖁᑎᒋᔭᐅᕗᖅ ᑕᐅᖅᓰᔩᑦ ᑮᓇᐅᔾᔭᒃᓵᖑᔪᑦ ᑯᐊᐳᕇᓴᓐ (“ᑯᐊᐳᕇᓴᓐ”) ᐊᒻᒪᓗ ᒪᓕᒋᐊᖃᓲᑦ ᑯᐊᐳᕇᓴᐅᔫᑉ ᐊᓯᖕᓄᑦ ᑕᑯᔭᐅᔭᕆᐊᖃᙱᑦᑐᑦ ᑐᑭᓯᒋᐊᕈᑏᑦ ᐊᑐᐊᒐᖓᓂ, ᐊᐅᓚᑦᑎᔪᑦ ᖃᓄᖅ ᑲᓇᐃᑎᐊᓐ ᓄᐊᑦ−ᒃᑯᑦ ᓄᐊᑦᑎᓂᐊᕐᒪᖔᑕ, ᐊᑐᕐᓗᑎᑦ ᐊᒻᒪᓗ ᓴᒃᑯᐃᓗᑎᑦ ᐃᓄᑉ ᑐᑭᓯᒋᐊᕈᑎᖏᖕᓂᑦ.
ᑲᓇᐃᑎᐊᓐ ᓄᐊᑦ−ᒃᑯᑦ ᐊᑐᓲᖑᓂᖏᑦ ᑐᑭᓯᒋᐊᕈᑎᖕᓂᑦ ᐊᔾᔨᖃᙱᑐᐃᓐᓇᕆᐊᓖᑦ ᒪᓕᑦᑐᒋᑦ ᖃᓄᖅ ᐅᕙᑦᑎᓐᓄᑦ ᐱᓕᕆᖃᑎᖃᓲᖑᖕᒪᖔᖅᐱᑦ, ᐊᒻᒪᓗ ᖃᓄᐃᑦᑐᓂᒃ ᐱᔨᑦᑎᕋᕈᑎᓂᒃ ᓂᐅᕕᐊᒃᓴᓂᓪᓗ ᑐᒃᓯᕋᕐᒪᖔᖅᐱᑦ. ᐊᓪᓕᕐᒦᑦᑐᑦ ᑎᑎᖅᑐᖅᓯᒪᔪᑦ ᐃᓚᖏᑦ ᐊᑐᓲᕗᑦ ᑐᑭᓯᒋᐊᕈᑎᑎᑦ, ᐃᕝᕕᑦ ᐅᕝᕙᓘᓐᓃᑦ ᐊᓯᐊ ᐃᓄᒃ ᐃᓕᖕᓂᒃ ᑭᒡᒐᖅᑐᐃᔪᖅ, ᐃᓂᒃᓴᓕᐅᕋᐃᒻᒪᑕ ᐱᔨᑦᑎᕋᖅᑕᐅᔾᔪᑎᓂᒃ ᐊᑐᐃᓐᓇᐅᒪᑎᑕᖏᖕᓂᒃ ᑲᓇᐃᑎᐊᓐ ᓄᐊᑦ−ᒃᑯᑦ:
ᐃᓂᔅᓴᓕᐅᕋᐃᒐᕕᑦ
ᐃᓂᔅᓴᓕᐅᕋᐃᒐᕕᑦ ᑲᓇᐃᑎᐊᓐ ᓄᐊᑦ−ᒃᑯᓐᓄᑦ ᑐᑭᓯᒋᐊᕈᑎᖕᓂ ᑐᓂᓯᔭᕆᐊᖃᕋᔭᕋᕕᑦ ᐱᔭᕇᖅᑕᐅᖁᓪᓗᒍ ᓂᐅᕕᐊᕆᔭᐃᑦ. ᐱᖃᓯᐅᑎᔪᓐᓇᖅᑐᑦ ᐊᑏᑦ, ᐅᓪᓗᖓ ᐃᓅᕕᒥᓂᖅᐱᑦ, ᓇᓕᐊᓐᓂᒃ ᓄᓇᓕᕐᔪᐊᕐᒥᐅᑕᐅᒻᒪᖔᖅᐱᑦ, ᐊᕐᓇᐅᒻᒪᖔᖅᐱᑦ ᐊᖑᑕᐅᒻᒪᖔᖅᐱᑦ, ᐊᐃᑉᐸᖃᕐᓃᑦ, ᖃᐅᔨᒃᑲᖅᑕᐅᓗᑎᑦ ᑐᑭᓯᒋᐊᕈᑎᑎᑦ (ᓲᕐᓗᒃ ᑐᕌᕈᑏᑦ, ᐅᖄᓚᐅᑎᕕᑦ ᓈᓴᐅᑎᖓ ᐊᒻᒪᓗ ᖃᕋᓴᐅᔭᒃᑯᑦ ᑐᕌᕈᑏᑦ), ᐊᒻᒪᓗ ᐊᑭᓕᒃᓴᓂᐅᑎ ᐊᐅᒃᑕᔫᖅ ᓈᓴᐅᑎᖓ ᐊᒻᒪᓗ ᐃᓱᓕᓐᓂᕆᒐᔭᖅᑕᖓᑕ ᐅᓪᓗᖓ ᐅᕝᕙᓘᓐᓃᑦ ᐊᓯᐊᑎᒍᑦ ᐊᑭᓕᖅᓱᐃᓂᕐᒧᑦ ᑐᑭᓯᒋᐊᕈᑎᑦ. ᑕᒪᒃᑯᐊ ᑐᑭᓯᒋᐊᕈᑏᑦ ᐱᔭᐅᔭᕆᐊᓖᑦ ᓇᓗᓇᐃᖅᑕᐅᑦᑎᐊᖁᓪᓗᑎᑦ, ᖃᐅᔨᒃᑲᖅᑕᐅᖁᓪᓗᑎᑦ, ᐊᒻᒪᓗ ᐱᔭᕇᖅᑕᐅᖁᓪᓗᒍ ᓂᐅᕕᐊᕆᒐᓱᐊᖅᑕᐃᑦ.
ᒐᕙᒪᒃᑯᓐᓄᑦ ᑐᓂᔭᐅᔭᕆᐊᖃᓲᑦ
ᐃᓛᓐᓂᒃᑯᑦ ᑲᓇᐃᑎᐊᓐ ᓄᐊᑦ−ᒃᑯᑦ ᐱᖁᔭᖅᑎᒍᑦ ᓄᐊᑦᑎᔭᕆᐊᖃᓲᑦ, ᐊᑐᕐᓗᑎᑦ ᐅᕝᕙᓘᓐᓃᑦ ᓴᒃᑯᐃᓗᑎᑦ ᑐᑭᓯᒋᐊᕈᑎᖕᓂᑦ ᖃᐅᔨᒪᙱᒃᑲᓗᐊᕐᓗᑎᑦ ᐊᖏᙱᒃᑲᓗᐊᕐᓗᑎᓪᓘᓐᓃᑦ. ᑕᐃᒪᐃᓲᖑᓗᐊᖅᑐᑦ ᐅᕙᑦᑎᒍᑦ ᐊᐅᓪᓚᕐᓂᕋᐃᒐᕕᑦ ᐊᒻᒪᓗ ᒐᕙᒪᒃᑯᑦ ᑐᒃᓯᕋᖅᓯᔪᒥᓂᐅᑎᓪᓗᒋᑦ ᓴᒃᑯᐃᓗᑕ ᐃᓚᖏᖕᓂᒃ ᑐᑭᓯᒋᐊᕈᑎᓂᑦ. ᑲᓇᐃᑎᐊᓐ ᓄᐊᑦ−ᒃᑯᑦ ᓴᒃᑯᐃᔭᕆᐊᖃᕋᔭᕐᒥᔪᑦ ᑕᐃᒪᐃᒋᐊᖃᖅᑎᓪᓗᒋᑦ ᓄᓇᕐᔪᐊᕐᒧᑦ ᐃᓯᖅᑐᖃᖅᑎᓪᓗᒍ ᑖᒃᓯᔅᓕᕆᔨᖏᓪᓗ (ᓇᓕᐊᓐᓂᑐᐃᓐᓇᖅ ᓄᓇᓕᕐᔪᐊᕐᒥᒃ) ᑐᑭᓯᒋᐊᕈᑎᓂᒃ ᑎᒍᒥᐊᖅᑕᑦᑎᓐᓂᒃ ᐃᕝᕕᑦ ᒥᒃᓵᓅᖓᔪᓂᒃ ᐊᒻᒪᓗ ᐊᐅᓪᓚᕐᓂᐊᕐᓂᕕᑦ ᐋᖅᑭᒃᓱᖅᓯᒪᓂᖏᓐᓂᒃ. ᐱᖃᓯᐅᑎᔪᓐᓇᕆᓪᓗᑎᑦ ᑕᒪᒃᑯᐊ ᓇᓗᓇᐃᔭᖅᓯᒪᓂᖏᑦ ᓄᓇᓕᕐᔪᐊᕐᒥᐅᑕᐅᖏᓐᓇᕈᑎᕕᑦ ᓇᓗᓇᐃᒃᑯᑕᖓ ᓈᓴᐅᑎ, ᓄᓇᓕᕐᔪᐊᕐᒥᐅᑕᐅᓂᕆᔭᐃᑦ ᖃᓄᐃᑦᑑᒻᒪᖔᖅ, ᓄᓇᓕᕐᔪᐊᕐᒧᑦ ᓅᒍᓐᓇᐅᑎ ᓈᓴᐅᑎᖓ, ᖃᓄᖅ ᐊᑭᓖᓐᓂᕐᒪᖔᖅᐱᑦ ᖃᖓᑦᑕᐅᑎᖕᓄᑦ, ᐊᒻᒪᓗ ᓇᓗᓇᐃᔭᖅᓯᒪᓂᖏᑦ ᖃᓄᖅ ᐃᓂᒃᓴᓕᐅᕐᓂᕐᒪᖔᖅᐱᑦ.
ᐊᔾᔨᐅᙱᑦᑐᒥᒃ ᐃᑲᔪᕐᓂᖅ ᑎᒥᒃᑯᑦ ᐊᔪᕈᑎᓕᓐᓄᑦ ᐊᓯᖏᓪᓗ
ᑲᓇᐃᑎᐊᓐ ᓄᐊᑦ−ᒃᑯᑦ ᐊᑐᐃᓐᓇᐅᒪᑎᑦᑎᓲᑦ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᔨᑦᑎᕋᕈᑎᓂᒃ ᐃᑭᒪᓲᖁᑎᑦᑎᓐᓄᑦ ᑎᒥᒃᑯᑦ ᐊᔪᕈᑎᖃᖅᑎᓪᓗᒋᑦ ᐊᒻᒪᓗ ᐸᖅᑭᔨᖃᐅᙱᑦᑐᓄᑦ ᓄᑕᖅᑲᓄᑦ.
ᐱᔨᑦᑎᖅᑕᐅᑦᑎᐊᖁᓪᓗᒋᑦ ᐃᓄᐃᑦ ᐊᔾᔨᐅᙱᑦᑐᓂᒃ ᑭᙴᒪᑦᑎᓲᑦ ᐃᑲᔪᖅᑕᐅᔭᕆᐊᓖᑦ ᐊᒻᒪᓗ ᖃᐅᔨᒪᓴᑦᑎᐊᖁᓪᓗᒍ ᐋᓐᓂᐊᖅᑕᐃᓕᒪᓂᐊᙱᒻᒪᑕ ᐊᑦᑕᕐᓇᖅᑕᐃᓕᒪᓂᕐᓗ ᑭᓇᓕᒫᕐᒧᑦ, ᑲᓇᐃᑎᐊᓐ ᓄᐊᑦ−ᒃᑯᑦ ᑐᑭᓯᒋᐊᕈᑎᒃᑲᓐᓂᕐᓂᒃ ᑐᒃᓯᕋᕈᓐᓇᕐᒪᑕ ᐱᔭᕆᐊᖃᖅᑐᑎᑦ, ᓲᕐᓗᒃ ᐅᑯᓂᖓ ᑐᕌᖓᔪᑦ ᐋᓐᓂᐊᕐᓂᕐᒧᑦ ᑐᑭᓯᒋᐊᕈᑏᑦ, ᓂᕆᔭᐅᔭᕆᐊᖃᙱᑦᑐᑦ ᐱᓪᓗᒋᑦ ᑐᒃᓯᕋᖅᑐᑦ ᐊᒻᒪᓗ ᑐᑭᓯᒋᐊᕈᑏᑦ ᑭᓱᑐᐃᓐᓇᕐᒧᑦ ᒪᓕᑦᑕᐅᔭᕆᐊᖃᓲᑦ, ᓲᕐᓗᒃ ᑲᐃᓪᓗᐊᕈᑎᖃᕆᐊᓖᑦ, ᐊᓂᖅᓵᕈᑎᓂᒃ ᐅᕝᕙᓘᓐᓃᑦ ᐊᓯᐊᓂᒃ ᐊᔾᔨᐅᙱᑦᑐᒥᒃ ᐃᑲᔫᑏᑦ ᐊᑐᖅᑕᐅᔭᕆᐊᖃᖅᑎᓪᓗᒋᖏᑦ. ᑖᒃᑯᐊ ᑐᑭᓯᒋᐊᕈᑏᑦ ᓴᒃᑯᑕᐅᔪᓐᓇᕐᒪᑕ ᑲᓇᐃᑎᐊᓐ ᓄᐊᑦ−ᒃᑯᑦ ᓈᒻᒪᑦᑐᒃᑯᑦ ᐃᑲᔪᖅᑐᐃᑦᑎᐊᕈᓐᓇᖁᓪᓗᒋᑦ ᐊᔪᕈᑎᓕᓐᓂᒃ ᐊᔾᔨᐅᙱᑦᑐᓂᓪᓗ ᐱᔭᕆᐊᓕᓐᓂᒃ.
ᐱᔨᑦᑎᖅᑕᐅᖁᓪᓗᒋᑦ ᐸᖅᑭᔨᖃᙱᑦᑐᑎᑦ ᐊᐅᓪᓚᖅᑐᑦ ᓄᑕᖅᑲᑦ, ᑲᓇᐃᑎᐊᓐ ᓄᐊᑦ−ᒃᑯᑦ ᐃᓄᑉ ᑐᑭᓯᒋᐊᕈᑎᖏᖕᓂᒃ ᐱᔭᕆᐊᓖᑦ ᓲᕐᓗᒃ ᐅᑯᓂᖓ ᐃᓄᓐᓂᒃ: ᓄᑕᖅᑲᖅ, ᐊᖓᔪᖅᑳᕆᔭᐅᔫᒃ ᕿᑐᕐᖓᓖᒃ (ᐅᕝᕙᓘᓐᓃᑦ ᒥᐊᓂᖅᓯᔨᖏᒃ), ᐃᓐᓇᖅ ᖃᖓᑕᓲᒃᑯᕕᒻᒨᕈᔾᔨᔪᖅ, ᐃᓐᓇᐃᑦ ᐅᐊᑦᑎᓂᐊᖅᑐᑦ ᐊᖅᑯᓵᕐᕕᐅᔪᓂ ᐊᒻᒪᓗ ᐃᓐᓇᐃᑦ ᓄᑕᖅᑲᒥᒃ ᓂᐅᕝᕕᐅᕆᐊᕐᓂᐊᖅᑐᑦ ᑎᑭᒃᑯᑎᑦ.
ᐊᑭᑭᓪᓕᒋᐊᕈᑏᑦ
ᑲᓇᐃᑎᐊᓐ ᓄᐊᑦ−ᒃᑯᑦ ᐊᑭᑭᓪᓕᒋᐊᖅᑎᑦᑎᓲᑦ ᐃᓐᓇᑐᖃᕐᓄᑦ, ᐃᓐᓇᒻᒪᕆᖕᓄᑦ, ᓄᑕᖅᑲᓄᑦ ᐊᒻᒪᓗ ᐃᓚᐃᖅᑐᑦ ᖃᖓᑦᑕᐅᑎᖏᓐᓂᒃ. ᖃᐅᔨᓵᖑᖁᓪᓗᑎᑦ ᐱᔪᓐᓇᕐᒪᖔᖅᐱᑦ ᐊᑭᑭᓪᓕᒋᐊᕈᑎᓂᒃ ᐊᒻᒪᓗ ᖃᐅᔨᒪᓇᑦᑎᐊᖁᓪᓗᒍ ᖃᖓᑦᑕᐅᑏᑦ ᑲᒪᒋᔭᐅᑦᑎᐊᕐᓂᕐᒪᖔᖅ ᑲᓇᐃᑎᐊᓐ ᓄᐊᑦ−ᒃᑯᑦ ᐃᕝᕕᑦ ᒥᒃᓵᓅᖓᔪᓂᒃ ᑐᑭᓯᒋᐊᕈᑎᓂᒃ ᐱᔭᕆᐊᖃᕋᔭᖅᑐᑦ ᓲᕐᓗᒃ ᐅᓪᓗᖅ ᐃᓅᕕᒥᓃᑦ ᐅᕝᕙᓘᓐᓃᑦ ᓇᓗᓇᐃᒃᑯᑕᖅ ᐃᓅᔪᓐᓃᖅᑐᖃᖅᑎᓪᓗᒍ.
• ᐊᕈᐊᕋ ᐊᖅᓴᕐᓃᑦ ᓈᓴᐅᑎᑖᕈᑎᖏᑦ ᓄᐊᑕᐅᓲᑦ ᖃᖓᑕᓲᒃᑰᖅᑐᖃᖅᑎᓪᓗᒍ ᐱᓕᕆᐊᖅ
ᐊᑎᓕᐅᕈᕕᑦ ᐊᕈᐊᕋ ᐊᖅᓴᕐᓃᑦ ᓈᓴᐅᑎᑖᕈᑎᖏᑦ ᓄᐊᑕᐅᓲᑦ ᖃᖓᑕᓲᒃᑰᖅᑐᖃᖅᑎᓪᓗᒍ ᐱᓕᕆᐊᖓᓄᑦ, ᐊᑐᓲᕗᑦ ᐃᓕᖕᓅᖓᔪᑦ ᑐᑭᓯᒋᐊᕈᑏᑦ ᐃᓂᒃᓴᓕᐅᖅᑕᐅᖁᓪᓗᑎᑦ ᐊᒻᒪᓗ ᖃᖓᑦᑕᐅᓯᖅᑕᐅᓗᑎᑦ ᐅᕙᑦᑎᒍᑦ, ᐊᒻᒪᓗ ᐊᐅᓚᑕᐅᖁᓪᓗᒋᑦ ᑲᒪᒋᔭᐅᓗᑎᓪᓗ ᑲᓇᐃᑎᐊᓐ ᓄᐊᑦ−ᒃᑯᑦ ᓈᓴᐅᑎᑎᑦ, ᐊᐅᓪᓚᕈᓐᓇᐅᑎᑎᑦ ᐊᒥᓲᓂᖏᑦ ᓈᓴᐅᑏᑦ ᐊᒻᓗ ᐃᓕᖕᓅᖅᑕᐅᓗᑎᑦ ᐊᑐᐃᓐᓇᐅᒪᔪᖁᑎᕗᑦ ᖃᖓᑦᑕᐅᑏᑦ ᒪᓕᑦᑐᒋᑦ ᐱᔪᒪᓂᕆᓲᑎᑦ ᐊᒻᒪᓗ ᐊᐅᓪᓚᖃᑦᑕᕐᓂᕆᔭᑎᑦ.
• ᓯᕗᓪᓕᖅᐹᖑᓪᓗᑎᑦ ᐊᐅᓪᓚᑎᑦᑎᕕᐅᖃᑦᑕᖅᑐᑦ ᑎᑎᖅᑐᖅᓯᒪᓂᖏᑦ
ᖃᖓᑕᓲᒃᑰᓲᑦ ᑲᓇᐃᑎᐊᓐ ᓄᐊᑦ−ᒃᑯᑦ ᐊᑎᓕᐅᕈᓐᓇᖅᑐᖅ ᐃᓚᒋᔭᐅᓕᕐᓗᑎᑦ ᑎᑎᖅᑐᖅᓯᒪᔪᓅᖅᑕᐅᓗᑎᑦ ᓯᕗᓪᓕᖅᐹᖑᓂᐊᕐᒪᑕ ᑎᑎᖅᑲᐅᓯᐊᖅᑖᕐᓗᑎᑦ ᐃᓱᒪᖅᓱᖅᑐᑎᑦ ᐊᑎᓕᐅᕈᒪᓐᓂᕈᕕᑦ. ᐊᑎᓕᐅᖅᑎᓪᓗᑎᑦ, ᖃᖓᑕᓲᒃᑰᓲᑦ ᑲᓇᐃᑎᐊᓐ ᓄᐊᑦ−ᒃᑯᓐᓂ ᑐᑭᓯᒋᐊᕈᑎᖏᓐᓂᒃ ᑐᓂᓯᓲᑦ ᑲᓇᐃᑎᐊᓐ ᓄᐊᑦ−ᒃᑯᑦ ᑐᓴᖅᑎᓐᓂᐊᕐᒪᒋᑦ ᐊᑭᑭᓪᓕᒋᐊᖅᓯᒪᔪᓂᒃ ᖃᖓᑦᑕᐅᑎᓂᑦ ᐊᒻᒪᓗ ᐊᓯᖏᓐᓂᒃ ᐊᑐᐃᓐᓇᐅᒪᑎᑦᑕᑦᑎᓐᓂᒃ ᐊᑭᑭᓪᓕᒋᐊᖅᓯᒪᔪᓂᒃ, ᑐᑭᓯᒋᐊᕈᑎᑎᑦ ᐲᖅᑕᐅᒃᑲᕈᓐᓇᖅᑕᑎᑦ ᖃᖓᑐᐃᓐᓇᑦᑎᐊᒃᑯᑦ ᖃᕋᓴᐅᔭᒃᑯᑦ ᐊᐅᓪᓚᖅᑎᑦᑎᓗᑎᑦ ᐅᕗᖓ reservat@canadiannorth.com.
ᐃᖅᑲᓇᐃᔮᒃᓴᑦ
ᑲᓇᐃᑎᐊᓐ ᓄᐊᑦ−ᒃᑯᑦ ᓴᖅᑭᔮᖅᑎᑦᑎᓲᑦ ᐃᓐᓄᒃᑕᐅᓯᒪᙱᑦᑐᓂᒃ ᐃᖅᑲᓇᐃᔮᒃᓴᓂᑦ ᐃᑭᐊᖅᑭᕕᖓᓂ. ᐃᓄᒃ ᐱᓇᓱᓐᓂᕈᓂ ᐃᖅᑲᓇᐃᔮᒃᓴᒧᑦ ᐱᔭᕇᖅᓯᔪᓐᓇᖅᑐᖅ ᐃᖅᑲᓇᐃᔮᖅᑖᕋᖃᓱᐊᕐᓂᕐᒧᑦ ᓈᑎᕆᐊᓕᒻᒥᒃ ᑐᑭᓯᒋᐊᕈᑎᓂᑦ ᑎᑎᕋᖁᔨᓯᒪᓲᖅ ᐅᕝᕙᓘᓐᓃᑦ ᑐᓂᓯᔪᓐᓇᖅᑐᑎᑦ ᐃᓕᓐᓂᐊᖃᑦᑕᕐᓂᑯᒥᓂᖏᑦ ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᑕᓗ ᑎᑎᕋᖅᓯᒪᔭᖏᓐᓂ. ᑖᒃᑯᐊ ᑐᑭᓯᒋᐊᕈᑏᑦ ᐊᑐᖅᑕᐅᓲᑦ ᖃᐅᔨᒃᑲᖅᑕᐅᖁᓪᓗᑎᑦ ᐊᒻᒪᓗ ᕿᒥᕐᕈᔭᐅᖁᓪᓗᒍ ᐃᖅᑲᓇᐃᔮᖅᑖᕋᓱᐊᕈᑏᑦ.
(ᖃᐅᔨᒪᒋᐊᕆᑦ ᖁᓛᓃᑦᑐᑦ ᑎᑎᖅᑐᖅᓯᒪᔪᑦ ᐱᖃᓯᐅᔾᔨᒻᒪᑕ ᐃᓚᐃᓐᓇᑯᓗᖏᓐᓂᒃ ᐆᑦᑐᑎᓂᒃ ᐊᒻᒪᓗ ᑕᒪᐃᓐᓂᓕᒫᕐᓅᖓᙱᑦᑐᑎᑦ).
ᐊᐱᖅᑯᑏᑦ
ᐊᐱᖅᑯᑎᖃᕐᓂᕈᕕᑦ ᐅᕝᕙᓘᓐᓃᑦ ᐅᖃᐅᓯᒃᓴᖃᕈᕕᑦ ᐅᕝᕙᓘᓐᓃᑦ ᐅᓐᓂᕐᓗᒍᒪᒍᕕᑦ ᖃᓄᖅ ᓄᐊᑦᑎᓲᖑᒻᒪᖔᑦᑕ, ᐊᑐᕐᓗᑕ ᐅᕝᕙᓘᓐᓃᑦ ᓴᒃᑯᐃᓗᑕ ᐃᓄᑉ ᑐᑭᓯᒋᐊᕈᑎᖏᖕᓂᒃ, ᖃᐅᔨᒃᑲᕈᓐᓇᖅᑕᓯ ᑲᙳᓇᖅᑐᓕᕆᔨᕗᑦ ᐅᕗᖓ ᑎᑎᕋᕐᕕᒋᓗᒍ privacyofficer@eig.ca.